Foto: gov.kz
Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin internettiń sapasy nege tómendep ketkenin aitty, dep habarlaidy Sputnik Qazaqstan.
Májiliste ótip jatqan Úkimet saǵatynda Tsifrlyq damý ministri sońǵy kezde internet sapasy nasharlap ketkenin moiyndady. Osy oraida Mýsin onyń sebepterine toqtaldy.
"Internet sapasy nege tómen degen shaǵymdar kóp, ony biz moiyndaimyz! Biraq keibir faktorlarǵa toqtalsaq. Ózderińiz biletindei, qazirgi ýaqytta tsifrlyq ekonomika, oiyn-saýyq kontenti ósti. Mysaly TikTok, YouTube, odan da basqa qosymshalar bar, olar tolyǵymen qoldanylýda. Kórip tursańyz, kúndelikti ómirde taksister de baǵdarshamda turǵanda telefonǵa qarap, video kóredi. Biznestiń virtýaldy qarym-qatynasqa shyǵýy, iaǵni ekonomikalyq is-árekettiń platformalyq modelge ótýine orai internet traffikti paidalaný qarqyny edáýir ósýde", - dep túsindirdi ol.
Aitýynsha, pandemiia kezinen bastap bul kórsetkish 800 petabaitqa jetken. Halyqaralyq telekommýnikatsiia odaǵynyń (ITU) málimetinshe, byltyr búkil álem boiynsha internetti paidalanatyn adamdar sany 4,9 milliardtan asty. Al dál osy ýaqytta elimizde internet paidalanýshylardyń sany 90,9 paiyzdy quraidy.
"Internet qoldanýshylar sany ǵana emes, sonymen birge olardyń internette ótkizetin ýaqyty da ósýde. Atalǵan faktorlar bailanys infraqurylymyna túsetin salmaqtyń artýyna basty sebep", - dedi Mýsin.
Bul rette ministrlik bazalyq stantsiialardy kóbeitý jumysyn júrgizip jatyr. Ministrdiń aitýynsha, internet sapasynyń nasharlaýyna radiofobiia da sebep bolyp otyr.
"Búkil álemde uialy bailanystyń damýyna burynnan kedergi bolǵan radiofobiia problemasy bar. Bizdiń memlekette de osyndai toptar bazalyq stantsiialardy demontajdaý saldarynan bailanys sapasynyń kúrt tómendeýine sebep bolady. Iaǵni, bul máseleni túbegeili sheshpei, bailanys sapasyn jaqsartý múmkin emes", - dedi Mýsin.
Ol demontaj saldarynan internet trafigi azaiatynyn, buǵan qosa turǵyndar internet trafigin kúsheitý quraldaryn qosatynyn atap ótti. Al bul óz kezeginde basqa úilerde turǵan bazalyq stantsiialarǵa aýrtpashylyq túsiredi.
