2019 jyldan bastap barlyq dári-dármekke baǵalardy retteý júiesi engiziledi. Bul týraly búgin Úkimettiń selektorlyq rejimdegi otyrysynda Densaýlyq saqtaý ministri Eljan Birtanov aitty, dep habarlaidy "Ult aqparat".
«Ózekti problemalardyń biri azamattardyń dárilik qamtamasyz etilýge quqyqtaryn saqtaý bolyp tabylady. Biz halyqtan túsken 3000-nan astam shaǵymǵa taldaý júrgizdik. Olardyń negizgi sebepteriniń biri - dárilik zattardy satyp alýdy josparlaýdyń tiimsiz júiesi, dárilik qamtamasyz etý rásimderiniń ashyq bolmaýy», - dedi ministr.
Onyń aitýynsha, 2016-2017 jyldary 11 óńirde jalpy 4,3 mlrd teńge somasynda dárilik zattardyń qaldyqtary anyqtalǵan.
«Memlekettik baǵdarlamada kózdelgen azamattardy dárilik qamtamasyz etý jónindegi sharalar mynalardy qamtamasyz etedi: barlyq tegin dári-dármek berý derbestendirilgen elektrondyq esepke alynady; Memleket basshysynyń tapsyrmasyna sáikes 2019 jyldan bastap barlyq dári-dármekke baǵalardy retteý júiesi ázirlenip, ony iske qosý jáne dári-dármekti ilki qadaǵalaý júiesi engiziledi», - dedi Eljan Birtanov.
Sonymen qatar, 2020 jylǵa qarai dárilik qamtamasyz etýdiń aqparattyq júiesi arqyly retseptilik preparattardy elektrondyq bosatýǵa ótý qamtamasyz etiletin bolady.
