203 myńnan astam jumys berýshi 1,1 mln adamnyń eńbekaqysyn arttyrý mindetin moinyna aldy. Bul týraly búgin halyqpen eseptik kezdesý ótkizip jatqan Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy QazAqparat tilshisi.
Ministr Tuńǵysh Prezidenttiń qazan aiyndaǵy Joldaýyn júzege asyrý úshin 2019 jyldyń basynan bastap eń tómengi jalaqy mólsheri 1,5 esege - 28-den 42,5 myń teńgege deiin arttyrylǵanyn aitty. Bul sharamen 1,3 mln adam qamtyldy, onyń ishinde bilim berý, densaýlyq saqtaý, áleýmettik qyzmet kórsetý, mádeniet jáne sport salalarynda jumys isteitin 275 myń azamattyq qyzmetshi bar.
«Biz ai saiyn eń tómengi jalaqyny esepteý monitoringin júrgizemiz. Máselen, mindetti zeinetaqy jarnalarynyń túsimderin taldaý nátijeleri biylǵy sáýirde 92 myń qyzmetker eńbek aqyny ETJ mólsherinen tómen alǵanyn kórsetti. Sondai-aq, eńbekaqysy tómen qyzmetkerler boiynsha jalaqynyń ósýine monitoring júrgizemiz. Qazirgi ýaqytta 203 myńnan astam jumys berýshi 1,1 mln adamnyń eńbekaqysyn arttyrý mindetin óz moinyna aldy», - dedi ministr.
Munan basqa, onyń dereginshe, osy jyldyń maýsym aiynan bastap biýdjettik salanyń jekelegen qyzmetkerleriniń jalaqysy 30 paiyzǵa deiin artty. Densaýlyq saqtaý, bilim berý, áleýmettik qorǵaý, mádeniet, sport, aýyl sharýashylyǵy jáne basqa salalarda jumys isteitin 1 millionnan astam azamattyq qyzmetshiler osy aida joǵary jalaqy alady.
Endi bir qyzmetkerdiń ortasha jalaqysy 114,5 myń teńgeni quraidy (2019 jyldǵy 1 maýsymǵa deiin 99,6 myń teńgeni qurady). 2019 jylǵa atalǵan arttyrýǵa respýblikalyq biýdjetten 144,3 mlrd teńge kózdelgen.
