QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev «Baiqońyr» ǵarysh ailaǵy aýmaǵynda kabel urlanǵandyǵyn rastady, dep habarlaidy QazAqparat.
Aita keteiik, Májilistiń jalpy otyrysynda depýtat Snejanna Imasheva «Baiqońyr» ǵarysh ailaǵy aýmaǵynda uzyndyǵy 2,5 shaqyrym kabel urlanǵandyǵy týraly aqparat taraǵanyn aitty. Osy oraida ol ǵarysh ailaǵy nysandaryn qorǵaý boiynsha jumystardyń atqarylý barysy týraly surady.
«Shyn máninde mundai fakti boldy. Qylmystyq is ashylyp, quqyq qorǵaý organdary bul máseleni qarastyrýda. Onyń qorytyndysy boiynsha tiisti sheshim shyǵarylady. Búginde atalǵan nysan boiynsha jumys isteitin kúzet kompaniiasy keltirilgen shyǵyndy óteitinin málimdedi», - dedi A. Jumaǵaliev Parlament Májilisiniń jalpy otyrysynda depýtat saýalyna jaýap bere otyryp.
«Barsha perimetrdi qamtityndai kameralardy ornatý boiynsha jumys júrgizilýde. Sonymen qatar barsha qorshaýdy qalpyna keltirý sharalary atqarylýda», - dedi ministr.
Óz kezeginde Qarjy ministriniń birinshi orynbasary Berik Sholpanqulov «Baiqońyrda» múliktiń saqtalýyna reseilik tarap jaýapty ekenin, al qazaqstandyq «Baiqońyr balans» uiymy paidalaný talaptaryna baqylap, esep-qisap jáne monitoring sharalaryn júrgizetenin atap ótti.
