Bilim jáne ǵylym ministri Ashat Aimaǵambetov Qazaqstandaǵy arnaiy áleýmettik ortalyq pen balalar úiiniń bári keshendi tekseristen ótetinin málim etti, dep habarlaidy QazAqparat.
«Balalardyń quqyǵyn qorǵaý boiynsha respýblikalyq komissiia otyrysynda biraz másele aityldy. Naqty Aiagózde bolǵan máselege qatysty máselelerdi kóterdik. Biraq soǵan qaramastan bizdiń aqparatymyzǵa sáikes, biraz óńirde ártúrli keleńsiz jaǵdai áli de jalǵasýda. Mundaiǵa endi taǵy jol bermeý kerek. Óńirlerdegi balalardyń quqyqtaryn qorǵaý boiynsha komissiialardyń jumysynyń tiimdiligi óte tómen. Bul máselege kóńil aýdarý kerek. Komissiia otyrysynda qabyldanǵan sheshimge sáikes respýblikadaǵy balalar úiine, áleýmettik ortalyqtarǵa, basqa da uiymdarǵa úlken keshendi tekseris ótkizetin bolamyz. Sonyń nátijesinde tiisti shara qabyldanady», - dedi Ashat Aimaǵambetov Bilim jáne ǵylym ministrliginiń apparattyq otyrysynda.
Esterińizge sala ketsek, osyǵan deiin Aiagózdegi áleýmettik kómek ortalyǵynda 4 balanyń qaitys bolǵandyǵy habarlandy.
QR Ishki ister ministrligi istiń tergelýin óz baqylaýyna aldy. Osy oqiǵadan keiin QR Eńbek jáne halyqty áleýmettik qorǵaý ministrligi elimizdiń ár óńirinde ornalasqan meditsinalyq-áleýmettik kómek kórsetetin 113 mekemege tekserý júrgiziletinin málim etti. Onyń ishinde Aiagózdegi balalarǵa arnalǵan arnaiy áleýmettik kómek ortalyǵy bar. Al vedomstvoaralyq komissiia otyrysynda Qazaqstandaǵy adam quqyqtary jónindegi ýákil Elvira Ázimova arnaiy áleýmettik kómek ortalyǵynda kóptegen kemshilikti ataǵan edi.
