Búgin Senattaǵy parlamenttik tyńdaýda Aýyl sharýashylyǵy ministri Erbol Qarashókeev saladaǵy negizgi problemalardy aitty, dep habarlaidy QazAqparat.
«Eń aldymen, osy jyldyń 10 aiynda salanyń damý qorytyndylary týraly qysqasha baiandaýǵa ruqsat etińizder. Osy kezeń ishinde salanyń jalpy óniminiń kólemi 2,3%-ǵa tómendep, 6,4 trln teńgeni qurady.
Sebebi - biylǵy anomaldy qurǵaqshylyq. Sonyń saldarynan ósimdik sharýashylyǵynyń ónimi 6,1%-ǵa azaidy. Al mal sharýashylyǵynda ónim 3,7%-ǵa, tamaq óndirisinde 3,6%-ǵa ósti. Salanyń negizgi kapitalyna quiylatyn investitsiialar turaqty túrde ósip, olardyń jalpy kólemi 41,9%-ǵa kóbeidi, bul kórsetkish tamaq ónerkásibinde 5,9%-ǵa artty», - dedi E. Qarashókeev «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Onyń paiymynsha, sala áli de bolsa táýekeli joǵary, tabiǵi-klimattyq jaǵdailarǵa táýeldi bolyp otyr. Onyń negizgi sebepteri – tehnikalyq jáne tehnologiialyq artta qalýshylyq pen óndiristegi ekstensivtik ádisterdiń basymdylyǵy.
«Atap aitsam, ósimdik sharýashylyǵy ártaraptandyrýdy aiaǵyna jetkizýdi qajet etedi. Onda qoldanysta artta qalǵan agrotehnologiialar áli de bolsa basym, aýyspaly egis qaǵidalary durys saqtalmaidy, topyraq qunarlylyǵy tómendeýde. Osynyń bári jer protsesterin baqylaýdyń jetik tetikteriniń áli de bolsa joqtyǵynan bolyp otyr. Sonymen qatar, selektsiianyń eskirgen ádisterine negizdelgen tuqym sharýashylyǵy júiesi de ýaqyt talaptaryna sai emes jáne sonyń saldarynan tuqymdar boiynsha importqa táýeldi bolý qaýpi bar», - dedi ministr.
Onyń sózine qaraǵanda, mal sharýashylyǵynyń negizgi kemistigi – ol salany jem-shóp bazasynyń múmkindigine qaramai damytýynda. Elimizde mal azyǵy zootehnikalyq normadan 2 ese az óndiriledi. Jaiylymdardyń 20%-dan 60%-ǵa deiingi bóligi tozǵan, al jaiylymdyq alqaptardyń 42%-y sýlandyrýdyń joqtyǵynan paidalanylmaýda.
«Veterinariia salasynda da kemshilikter bar. Aýyldy jerlerde veterinariialyq qyzmet kórsetý tiisti deńgeide damymaýda. Bul salaǵa tsifrlandyrý isteri áli de bolsa jetpegen, mamandar qaǵazbasty jumystan arylmaǵan. Sonymen qatar, ortalyq jáne jergilikti atqarýshy organdardyń veterinariialyq qyzmetteri arasynda ókilettikterdiń arajigin tolyq ajyratý qajet. Mal dárigerleriniń jalaqysy óte tómengi deńgeide», - dedi vedomstvo basshysy.
