Qazaqstan Aýǵanstanǵa bes myń tonna un túrinde gýmanitarlyq kómek kórsetti. Budan bólek, aýǵan tarapynyń taǵy bir ótinishi bolǵan. Bul týraly syrtqy ister ministri Muhtar Tileýberdi málimdedi, dep habarlaidy Sputnik Qazaqstan.
"Qazir tek 5 myń tonna un jiberý týraly sheshim qabyldandy, ol jetkizilip te qoidy. Basqa kómek týraly másele turǵan joq. Jalǵyz ǵana nárse - aýǵan tarapy qazaqstandyq QazVac vaktsinasyn jekizý túrinde gýmanitarlyq kómek kórsetýdi surady", - dedi Tileýberdi seisenbi kúni jýrnalisterge.
Ol Aýǵanstanǵa jóneltiletin QazVac vaktsinasynyń sany qazir qaralyp jatqanyn málimdedi. Sońǵy sheshimdi Qazaqstan úkimeti qabyldaidy.
Buǵan deiin Prezident Qasym-Jomart Toqaev Qazaqstan aýǵan halqyna gýmanitarlyq kómek retinde 5 myń tonna un jiberý máselesin pysyqtap jatqanyn aitqan edi. Toqaev mundai kómek "bul elge únemi kórsetiletinin" atap ótti.
Buǵan deiin qazaqstandyq un tartýshylar Aýǵanstandaǵy saiasi jaǵdaiǵa alańdaýshylyq bildirgen edi. Aýǵanstan un saýdasynda Qazaqstannyń eń iri seriktesi bolatyn. Qazaqstan eksporttaityn unnyń úshten ekisi tikelei osy elge jóneltiletin. Keiin Qazaqstan SIM respýblika BUU qamqorlyǵymen Aýǵanstanǵa halyqaralyq gýmanitarlyq kómek kórsetý aiasynda bidai men un jetkizýge daiyn ekenin málimdedi.
Qazaqstan men Aýǵanstannyń qarym-qatynasy
Sondai-aq Muhtar Tileýberdi Taliban* qandai jaǵdaida tyiym salynǵan uiymdar tiziminen shyǵarylýy múmkin ekenin túsindirdi.
"Taliban* qozǵalysy BUU-nyń terroristik uiymdar tiziminde turǵandyqtan, halyqaralyq qaýymdastyq jańa úkimetti ázirge moiyndaǵan joq. Sol sebepti, eń aldymen, ony moiyndaý úshin, BUU qaýipsizdik keńesi arnaiy qarar qabyldaýy kerek. Barlyǵy Talibannyń* basqa elder aldyndaǵy mindettemelerin, halyqaralyq quqyqty qalai saqtaitynyna bailanysty. Olar dini terrorizm men ekstremizmniń taralýyna jol bermeýi kerek, kórshi memleketterge qaýip tóndirmeýge tiis", - dedi ministr úkimet kýlýarynda.
Aitýynsha, Aýǵanstanda ekonomikalyq kúireý men gýmanitarlyq daǵdarystyń oryn alýyna jol bermeý kerek. Sebebi bul bul esirtki tasymalynyń ósýine, dini ekstremizmniń taraýyna jáne bosqyndardyń kóbeiýine ákep soǵady.
"Qazaqstan aýǵan halqyna 5 myń tonna gýmanitarlyq kómek jóneltý týraly sheshim qabyldady. Sondai-aq bul elmen saýda-ekonomikalyq bailanystardy da jandandyrý kerek. Qazir saiasi kelissóz týraly sóz bolyp otyrǵan joq. Áńgime tek aýǵan halqyna kómek kórsetý jaily", - dedi Tileýberdi.
Eske salsaq, Aýǵanstan qazir Taliban* qozǵalysynyń baqylaýynda. Bul - Qazaqstanda, Reseide jáne basqa da birqatar elde tyiym salynǵan ekstremistik dini uiym.
