Nur-Sultan qalasyndaǵy «Astana Hub» aýmaǵynda 5G jelisin kommertsiialyq negizde iske qosý jumystary aiaqtalýda. Bul týraly Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev málim etti, dep habarlaidy QazAqparat.
«Qazaqstanda jańa tehnologiialardy engizý boiynsha jumystar júrgizip jatyrmyz. Prezidenttiń tapsyrmasyna sáikes, ministrlik Qazaqstanda 5G jelisin engizý boiynsha jumystar atqarýda. Osy oraida, Jol kartasy bekitildi. Qazirgi kezde 5G jańa mobildi bailanys tehnologiiasyn anyqtaý boiynsha jumystar júrgizilýde. 5G mobildi bailanysynyń testtik synaǵy Nur-Sultan, Almaty jáne Shymkent qalalarynda ótkizildi. Synaqtar jaqsy nátije kórsetti», - dedi A. Jumaǵaliev Parlament Májilisindegi Úkimet saǵatynda.
Onyń sózine qaraǵanda, synaq nátijesinde telemeditsina, ónerkásipti, taý-ken óndirisin tsifrlandyrý jáne «aqyldy» qalalardy damytýǵa múmkindikter beretini anyqtaldy. 5G tehnologiiasyn engizý úshin tartylatyn investitsiialar kólemi qomaqty bolǵandyqtan, birinshi kezeńde bul tehnologiiany engizý respýblikalyq mańyzdaǵy qalalarda (Nur-Sultan, Almaty, Shymkent- avt.) uiymdastyrý josparlanýda.
«Mysaly, Nur-Sultan qalasyndaǵy «Astana Hub» aýmaǵynda 5G jelisin kommertsiialyq negizde iske qosý jumystary júrip jatyr. Ol 2020 jyly tolyqtai iske qosylady. Osylaisha, 2021 jyldyń aiaǵyna deiin Nur-Sultan qalasynda Nazarbaev ýniversiteti men EKSPO-da, al 2022 jyly áýejai pen vokzalda, saýda oryndary men alańdarda 5G tehnologiiasyn engizý josparlanýda. Odan ári 2023 jyldan bastap barlyq oblys ortalyqtarynda engizý jumystary júrgiziledi», - dedi Asqar Jumaǵaliev.
