2022 jyly elimizdiń jalpy ishki ónimniń naqty ósýi 3,9 paiyz deńgeiinde boljanýda. Bul týraly Senattyń jalpy otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Ótken jylǵy jalpy ishki ónim boiynsha eseptik statistika derekteri jáne ekonomika damýynyń osy jyldyń qańtar-shilde ailaryndaǵy qorytyndylary men Halyqaralyq qarjy uiymdarynyń álemdik ekonomikanyń ósýi boiynsha jańartylǵan boljamdaryn eskere otyryp qalyptastyryldy. Kelesi jyly álemdik ekonomika - 4,9 paiyzǵa, 2023 jyly 3,5 paiyzǵa ósedi dep kútilýde. Halyqaralyq qarjy uiymdarynyń konsensýs-boljamy boiynsha kelesi jyly munaidyń baǵasy barreline 64,5 dollar, al 2023 jyly – 58 dollar deńgeiinde bolady», - dedi «Áleýmettik-ekonomikalyq damý boljamy» jáne «Ulttyq qordan kepildendirilgen transfert týraly» zań jobasy týraly baiandaǵan ministr.
Onyń atap ótýinshe, boljam pandemiiadan keiingi qalpyna keltirýdiń jahandyq úrdisterin eskere otyryp ázirlendi.
«Qazaqstannyń negizgi saýda áriptesteriniń ekonomikasynyń belseldiligi baiqalyp otyr. Áleýmettik-ekonomikalyq damýdyń boljamynda álemdik taýarlar naryǵyndaǵy baǵanyń qubylmalyǵy, halyqaralyq saýda jáne investitsiialyq trendter esepke alyndy. Osy jaǵdailardy eskere otyryp, makroekonomikalyq kórsetkishter boljamy konservativti tásilde qalyptasty. Biýdjetti josparlaýǵa negiz retinde bazalyq stsenarii alyndy. Oǵan sáikes munai baǵasy barreline 60 dollar dep boljanyp otyr. 2022 jyly jalpy ishki ónimniń naqty ósýi 3,9 paiyz deńgeiinde boljanýda. Bul kórsetkish 2026 jyly 5,2 paiyzǵa deiin jetedi. Bes jyl aralyǵynda jalpy ishki ónimniń ortasha jyldyq ósý qarqyny 4,8 paiyzdy quraidy», - dedi Áset Erǵaliev.
