1 maýsymnan bastap 225 myń meditsina qyzmetkeriniń jalaqysy kóteriledi. Bul týraly búgin Úkimet úiindegi baspasóz máslihatynda QR Densaýlyq saqtaý ministri Eljan Birtanov aitty, dep habarlaidy QazAqparat tilshisi.
«Biýdjet salasynyń tómen jalaqy alatyn barlyq qyzmetkerleriniń ailyǵy kóteriledi. Densaýlyq saqtaý júiesinde olar: medbikeler, ózge de tómen jalaqy alatyn qyzmetkerler, sanitarlar, birinshi kezekte jumysshylar jáne basqalar. Eńbek ótili eskerilgende olarǵa qansha jalaqy aýdarylatyn kóremiz jáne oǵan 30 paiyzdyq ústemeaqy qosylady», - dedi ol.
Osy oraida ministr naqty mysal da keltirip ótti.
«Máselen, eger sanitar 50 myń teńge alatyn bolsa, jalaqysy kóterilgennen keiin qolyna shamamen 65 myń teńge túsedi. Eger medbikeniń ortasha jalaqysy shamamen 75 myń teńge bolsa, onda ol shamamen 99-100 myń teńge alady. Buǵan qosa, aqyly qyzmetter kórsetý múmkindigi shektelgen salalardaǵy meditsina qyzmetkerlerin yntalandyrý úshin bul sanattaǵy dárigerlerdiń de jalaqysyn kóteremiz. Olar: emhana, jedel járdem, ana men bala, týberkýlez, onkologiia dárigerleri», - dedi E.Birtanov.
Jalpy onyń dereginshe, 1 maýsymnan bastap meditsina salasynda jumys isteitin 225 myń adamnyń jalaqysy 30 paiyzǵa artatyn bolady.
