«Ashyq» jobasynyń adal qatysýshylaryna demalys kúnderi jumys isteýge ruqsat berý kerek. Bul týraly búgin Úkimet otyrysynda «Atameken» Ulttyq kásipkerler palatasy basqarma tóraǵasynyń birinshi orynbasary Nariman Ábilshaiyqov aitty, dep habarlaidy QazAqparat.
«Ashyq» jobasynyń adal qatysýshylaryn yntalandyrý maqsatynda olarǵa demalys kúnderi jumys isteýge ruqsat etýdi suraimyz. «Qońyr-qyzyl» aimaqta bastapqyda senbi kúni saǵat 22.00-ge deiin, al «Ashyq» jobasynyń kóshbasshylaryna saǵat 24.00-ge deiin jumys isteýge ruqsat etýdi usynamyz», - dedi ol.
Sonymen qatar ol 10 tamyzdan bastap qyzmetkerlerdi mindetti túrde birinshi komponentpen egý kúshine engenin, alaida naqty tekserý algoritmi bekitilmegenin, monitoringilik toptar sýbektilerdi qalai tekseretini de túsiniksiz ekenin basa aitty.
«Óńirlerde oryn alǵan túrli jaǵdailarǵa bailanysty «Ashyq» jobasy boiynsha Bas memlekettik sanitarlyq dárigerdiń biryńǵai qaýlysyn ornatýdy usynamyz. Buǵan deiin bul usynys eskerilgen bolatyn, biraq «qyzyl» aimaq enbei qalyp otyr. Osy talapty «qyzyl» aimaqtaǵy óńirlerge taratýdy suraimyz. Óitkeni, qazir óńirlerdiń basym bóligi «qyzyl» aimaqqa enip otyr», - dedi Nariman Ábilshaiyqov.
