Qazaqstannyń Tuńǵysh Prezidenti, Nur Otan partiiasynyń tóraǵasy Nursultan Nazarbaev partiia múshelerine artylǵan jaýapkershilikti túsiný kerek ekenin aitty.
«Partiiamyzdyń damýynyń jańa kezeńge kelip otyrǵanyn bárimiz túsinip otyrmyz. Zaman ózgerip jatyr. Jaǵdai ózgeredi. Nur Otan jetekshi kúsh retinde saiasi basshylyqty bekitip, strategiialyq baǵyttan aýytqymaý úshin búkil qoǵamdy jumyldyrýy tiis. Biz - Qazaqstannyń, halyqtyń ortasyndaǵy eldi jeteleitin, elge túsindiretin uiymbyz. Muny oryndamasaq, onda bizdiń ornymyzǵa basqa partiia keledi. Sondyqtan jaýapkershilikti túsinýimiz kerek», - dedi Nazarbaev partiia saiasi keńesiniń keńeitilgen otyrysynda.
Elbasy 2050 jylǵa qabyldaǵan baǵdarlamada 30 damyǵan eldiń qataryna kiremiz degen maqsat qoiǵanymyzdy atap ótti.
«2050 jylǵa qabyldaǵan baǵdarlamada 30 damyǵan eldiń qataryna kiremiz degen maqsat qoidyq. Barlyq baǵdarlamalardy soǵan bailanysty jáne sol maqsatqa jetý úshin jasap jatyrmyz. Indýstrialdyq baǵdarlama, infraqurylym, aýyl sharýashylyǵy, úi qurylysy, meditsina, aǵartý jumystary, barlyǵy jasap jatqan jumysymyz – bir baǵytqa, bir múddege jetý máselesi. Sondyqtan bárimizdiń oiymyz osy maqsatqa jetý bolýy kerek», - dedi QR Tuńǵysh Prezidenti.
Buǵan qosa, Nazarbaev 2015 jyldan bastap elimizde bes institýtsionaldyq reformany júzege asyrý qolǵa alynǵanyn eske saldy. Ol: tiimdi memlekettik apparat, zań ústemdigi, ekonomikalyq ósim, bolashaǵy bir ult, transparentti jáne esep beretin memleket.
