12 maýsymnan bastap Milan – Almaty – Milan baǵytyndaǵy tikelei jolaýshylar áýe reisteri ashylady.
Indýstriia jáne infraqurylymdyq damý ministrligi baspasóz qyzmetiniń habarlaýynsha, Azamattyq aviatsiia komiteti tóraǵasynyń orynbasary Saltanat Tompieva italiialyq «NEOS» áýe kompaniiasynyń ókilderimen kezdesti.
Kezdesý barysynda taraptar Almaty jáne Milan qalalary arasynda halyqaralyq áýe reisterin ashý týraly kelisim jasady.
Milan – Almaty – Milan baǵytyndaǵy turaqty áýe reisteri biylǵy jyldyń 12 maýsymynan bastalady dep kútilýde. Jolaýshylar tasymaly ár aptanyń dúisenbi jáne beisenbi kúnderi Boeing 737 jáne 787 áýe kemeleri arqyly júzege asyrylmaq.
Sondai-aq kezdesý barysynda taraptar tikelei áýe reisteriniń ashylýy memleketter arasyndaǵy saýda-ekonomikalyq, investitsiialyq, týristik jáne mádeni yntymaqtastyqtyń odan ármen damýyna tigizetin mańyzyna nazar aýdardy.
Aita keteiik, «NEOS» áýekompaniiasy Milannyń Malpensa áýejaiynda (Italiia) ornalasqan. Alǵashqy reis 2002 jylǵy 8 naýryzda Milan – Senegal baǵyty boiynsha oryndalǵan.
Áýekompaniia AQSh, Maldiv Respýblikasy, QHR, Grek Respýblikasy, Kanar araldary, Dominikan Respýblikasy, Birikken Arab Ámirlikteri, Tailand jáne basqa elderge halyqaralyq reisterdi oryndaidy.
Búginde kompaniia parkinde B737 jáne B787 tiptegi 15 áýe kemesi bar.
