«Eki jyl buryn sal aýrýymen aýyratyn 66 jastaǵy Dennis Degrei óz miynan dosynyń telefonyna habarlama jibergen edi, sebebi onyń miyna kishkentai implanttar salynǵan bolatyn», dep jazady The Guardian.
Bul tarihi oqiǵa bolǵanymen, mamandardyń aitýynsha, implant miǵa ornalastyrylǵandyqtan, keri reaktsiia da bolady ári ýaqyt óte kele signaldar da álsirei beredi.
«Búkil álem boiynsha mundai implant tek on adamǵa salynǵan. Al shilde aiynda Ilon Mask Neuralink kompaniiasy qurastyryp jatqan implanttardy tanystyrǵan edi. Qazir bul implanttar maimyldarǵa qondyrylǵan, al 2020 jyldyń sońynda adamǵa salyna bastaidy. Neuralink kompaniiasyna 158 million dollar qarjy salynǵan», - delingen maqalada.
Degenmen, Ulybritaniianyń Patshalyq qaýymdastyǵy neiron interfeisiniń tehnologiialaryn qoldaný jáne retteýdiń júiesi qajet ekenin málimdedi.
«Midyń málimetteri kimge tiesili? Olar qandai maqsatta qoldanylýy múmkin? Úshinshi tarap midy basqarý múmkindigine ie bola ala ma? Implanttardy hakerler buza ala ma? Sonymen qatar etikalyq máselelerdi de eskerý kerek. Tehnologiialar tiimdi bolsa, ony tek bailar ǵana qoldana ala ma? Buny da zertteý kerek», - deidi qaýymdastyq mamandary.
Sarapshylardyń aitýynsha, tehnikalyq problemalar sheshilgenimen, áleýmettik faktorlar kedergi bolýy múmkin. Iaǵni, etikalyq, quqyqtyq jáne áleýmettik saldardy nazarǵa alý kerek.
