Lionel Messidiń «Pari Sen-Jermen» (PSJ) frantsýz fýtbol klýbyna ótýi jurtty shýlatty. Jankúierler Messi beinelengen klýbtyń atribýtikasyn satyp alý úshin kezekke turyp jatyr, dep habarlaidy "Ult aqparat" Reuters-ke silteme jasap.
Argentinalyq fýtbolshynyń esimi jazylǵan klýb fýtbolkalary Parijdegi «PSJ-nyń» dúkeninde satylyp jatyr. Áleýmettik jeli qoldanýshylary jańa klýbtyń akkaýntyna milliondap jazylýda. Al, «PSJ-nyń» Messi qatysatyn matchtaryn kórsetý quqyǵyn satyp alý úlken tabys ákelmek. Osylaisha, Lionel Messidiń Parijge kelýi aqsha aǵymyna oń yqpal etýde.
«PSJ» tóraǵasy Nasser al-Helaifi sársenbi kúni jýrnalisterge 34 jastaǵy alty dúrkin «Altyn dop» iesiniń klýbqa ákeletin tabysyna adamdardyń tańǵalatynyn málim etti.
Parijdiń ortalyǵyndaǵy «PSJ» dúkeninde bir jankúierdiń Messidiń sýreti bar 165 eýro (194 dollar) turatyn fýtbolkany satyp alý úshin eki saǵat kezekte turǵan.
«Men ony satyp alǵym keldi. Bul PSJ-ǵa kóp aqsha ákelse, jankúierlerge – qýanysh syilaidy. Bári de baqytty bolady», - dedi 18 jastaǵy Djonatan Msied Reuters-ke.
Sport marketingi jónindegi sarapshy Vensan Shodeldiń aitýynsha, Amazon (AMZN.O) kompaniiasy da tabysqa kenelmek. Bul kompaniia osy jyldyń maýsym aiynda joǵary frantsýz fýtbol divizionynyń 80% matchyn transliatsiialaý quqyǵyn jeńip alǵan.
«Amazon kompaniiasyn lotereia utyp aldy desek bolady. Messidiń qatysýymen ótetin osynsha matchty az aqshaǵa kórsetý – úlken jeńis. Ekinshi jeńimpaz - «PSJ». Ol álemniń iri klýbtary arasynda óz ornyn nyǵaitpaqshy», - dep atap ótti Shodel.
Aita keteiik, óz mansabynda tek «Barselonada» oinaǵan Messi kelisimshartty uzartý týraly kelisimge kele almaǵandyqtan katalondyq klýbtan ketýge májbúr bolǵan edi. Kóp uzamai onyń jańa klýbqa qatysty óz tańdaýyn jasaǵany týraly aqparat taratyldy. 34 jastaǵy fýtbolshy «Barsamen» 36 týrnirde jeńiske jetip, 672 gol soqty. Messi ótken jyly jazda «Barselonadan» ketpekshi boldy, biraq klýb ony jibergen joq. Osy jyldyń 1 shildesinde ol bos agent atandy. Senbi kúni Messi klýbpen kózine jas alyp qoshtasyp, jankúierleri men klýbtaǵy áriptesterine alǵys aitty.
