Norvegiia astanasy Oslo mańyndaǵy Berým kommýnasynda jas jigit meshitke kirip, adamdarǵa oq atty, dep habarlaidy Sputnik RIA Novosti agenttigine silteme jasap.
"Al-Nýr" islam ortalyǵynda atys 10 tamyz kúndiz, Qurban ait meiramy qarsańynda boldy. Saldarynan bir adam kóz jumyp, taǵy bireýi jaralanǵan.
Euronews habarlaǵandai, shabýyl jasaǵan jigittiń basynda shlem, ústinde bronejilet bolypty. Meshittegi adamdar qaskóidi politsiia kelgenge deiin qolǵa túsirdi.
Budan bólek, kúdiktiniń úiinen áieldiń denesi tabyldy. Ol jas jigittiń týysqany eken. Tártip saqshylary áiel kúdiktiniń qolynan qaza tapty dep sanaidy.
Qazir qylmysker qamaýǵa alyndy. Meshitten birneshe dana qarý tabyldy. Politsiianyń paiymynsha, jigit jalǵyz ózi áreket etken.
Eske sala ketsek, osyǵan uqsas jaǵdai 2019 jyldyń 15 naýryzynda Jańa Zelandiianyń Kraistcherch qalasynda bolǵan edi. Ol kezde terrorister meshitke kelgen 50 adamdy óltirdi. Teraktini 27 jastaǵy Brenton Tarrant uiymdastyrǵan.
