Elimizde 2006 jylǵy úlgidegi nominaly 2000, 5000 jáne 10000 teńgelik banknottardy aiyrbastaýǵa qatysty jańa sheshim qabyldanady. Bul jaiynda Májilis depýtattarynyń saýalyna QR Ulttyq banki tóraǵasy Erbolat Dosaevtyń jaýabynda aitylǵan, dep habarlaidy "Ult aqparat".
«2006 jylǵy úlgidegi nominaly 2000, 5000 jáne 10000 teńgelik banknottar 2006 jylǵy 15 qarashada ainalysqa shyǵaryldy jáne 2016 jylǵy 4 qazannan bastap zańdy tólem quraly bolýyn toqtatty. Ekinshi deńgeidegi bankter men ulttyq poshta operatory 2016 jyldan bastap 12 ai ishinde jáne Ulttyq banktiń filialdary 2020 jylǵy 5 qazanǵa deiin joǵaryda kórsetilgen banknottardy qabyldap, ulttyq valiýtanyń qoldanystaǵy aqsha belgilerine aiyrbastady», - dedi Erbolat Dosaev.
Onyń atap ótýinshe, buǵan deiin Ulttyq bank barlyq azamattar eski banknottardy ýaqtyly aiyrbastai almaýyna bailanysty 2006 jylǵy úlgidegi nominaly 2000, 5000 jáne 10000 teńgelik banknottardy qabyldaý men aýystyrý merzimin 2021 jylǵy 1 aqpanǵa deiin uzartqan bolatyn. Endi, bul sheshimge taǵy ózgeris engizilgeli otyr.
«Sonymen qatar, Ulttyq bank kelip túsken azamattardyń ótinishterin eskere otyryp, sondai-aq halyqaralyq tájiribeni nazarǵa alyp, Ulttyq bank filialdarynyń 2006 jylǵy úlgidegi banknottardy jáne keiingi jyldary shyǵarylǵan banknottardy aiyrbastaýynyń merzimsiz kezeńin engizý týraly sheshim qabyldaidy. Ulttyq banktiń aktilerine tiisti ózgerister engizilgennen keiin 2006 jylǵy úlgidegi banknottardy merzimsiz aiyrbastaý jónindegi aqparat Ulttyq banktiń resmi saitynda jáne buqaralyq aqparat quraldarynda ornalastyrylady», - dedi ol.
