Búgin, birinshi qyrkúiekte áskerge shaqyrý naýqany bastaldy. Ol osy jyldyń sońyna deiin jalǵasady. Osy ýaqyt ishinde Qarýly Kúshterdiń, basqa da áskerler men áskeri quralymdarynyń qataryn 18-27 jas aralyǵyndaǵy on jeti myńǵa jýyq jas azamat tolyqtyrady, dep habarlaidy Qorǵanys ministrliginiń baspasóz qyzmeti.
Jergilikti atqarýshy organdar «Áskeri qyzmet jáne áskeri qyzmetshilerdiń mártebesi týraly» QR Zańyna sáikes azamattardy merzimdi áskeri qyzmetke shaqyrýdy uiymdastyryp, qamtamasyz etedi. Áskerge alynǵan kúnnen bastap 12 ai qyzmet atqarǵan áskeri qyzmetshilerdi zapasqa shyǵarý da josparly tártippen júrgiziledi.
Ekinshi jyl qatarynan áskerge shaqyrý naýqany pandemiia jaǵdaiynda ótýde. Koronavirýsty juqtyrý qaýpin azaitý úshin áskerge shaqyrylýshylardy habardar etý Tsifrlyq damý, innovatsiialar jáne aeroǵarysh ónerkásibi ministrliginiń 1414 qyzmetimen SMS-habarlamalar jiberý arqyly júzege asyrylady.
Virýstyq infektsiiadan qosymsha qorǵanys PTR-tekserý bolyp tabylady. Áskerge shaqyrylýshylardy eki ret tekseredi. Áskerge shaqyrý kezinde jinaý pýnktterinde jáne áskeri bólimderge jańa tolyqtyrýlar kelgennen keiin.
– Barlyq suraqtar boiynsha azamattar elektrondyq poshta nemese qorǵanys isteri jónindegi departamentterdiń áleýmettik jelilerdegi resmi akkaýnttary arqyly habarlasa alady. Sybailas jemqorlyq kórinisteri týraly habarlamalar «Qarýly Kúshter – adaldyq alańy» jobalyq keńselerinde jáne senim telefondary arqyly qabyldanady, – dep túsindirdi Qarýly Kúshter Bas shtaby Uiymdastyrý-jumyldyrý jumystary departamentiniń bastyǵy polkovnik Sáken Júsipov.
Esterińizge sala ketsek, óńirlerdegi áskerge shaqyrý komissiialaryn oblys, qala jáne aýdan ákimderiniń orynbasarlary basqarady. Olar áskerge shaqyrý komissiiasynyń sheshimimen nemese meditsina mamandarynyń qorytyndylarymen kelispegen azamattardyń ótinishterin qaraidy.
