Merkide kóz jumǵan 19 jastaǵy Madinanyń ólimine qatysty qoǵamdaǵy talqylaý áli de basylǵan joq. Bul joly áleýmettik jelide marqumnyń qaiyn sińlisine qatysty túrli aqparat tarady, dep habarlaidy ult.kz.
Jýrnalist Jan Ahmadiev Madinanyń anasymen birge marqumnyń qaiyn jurtyna baryp, qyzynyń jeke zattary men kiimderin alyp ketpek bolǵan. Alaida sol jerde eki tarap arasynda túsinispeýshilik bolǵan.
Áleýmettik jelide taraǵan videoda Madinanyń qaiyn sińlisi zattardy alyp ketýge bailanysty daýys kóterip, «zatty áketińder» degen sóz aitqany estiledi. Kadrda buǵan qosa «qalyń mal bergenbiz» degen sóz de aitylǵan. Video jeli qoldanýshylary arasynda qyzý pikirtalas týdyrdy.
Osydan keiin jýrnalist Rýslan Ótepbaiǵa Madinany burynnan tanityn áiel habarlasqan. Onyń aitýynsha, byltyr naýryz aiynda ol Madinamen ginekologiia bóliminde bir palatada jatqan.
Hat avtory sol kezde Madinanyń júkti bolǵanyn jáne júktiligine bailanysty aýrýhanada jatqanyn jazǵan. Áieldiń sózinshe, Madina oǵan kúieýiniń jii qol kóteretinin aityp, otbasyndaǵy jaǵdaiyna shaǵymdanǵan.
«Kúieýim ne bolsa da ura beredi» dep jylaǵanyn aitqan hat avtory Madinanyń qaiyn sińlisi de otbasyndaǵy janjaldarǵa aralasatynyn jetkizgen. Sol kezde ol Madinaǵa zorlyq-zombylyqqa shydamaýǵa jáne qaýip tóngen jaǵdaida kúieýimen birge turmaýǵa keńes bergenin jazǵan.
Sonymen qatar hatta Madinanyń ákesi joq ekenin de sol áielge aitqany kórsetilgen. Alaida Madina bul jaǵdaidy ainalasyndaǵylarǵa bildirgisi kelmei, ákesi bar ekenin jáne jumys babymen ketkenin aitatyny jazylǵan.
Aita keteiik, hatta aitylǵan jaittar ázirge resmi túrde rastalǵan joq.
