Jambyl oblysyndaǵy Merki taýlaryn «Qyzyl kitapqa» engen qar barysy men úndi jairasy siiaqty ań-qustar meken etýde. Qorý jáne kúzetý jumystarynyń nátijesinde arqarlardyń da sany ósken, dep habarlaidy "Ult aqparat".
Aimaqta osydan eki jyl ǵana buryn «Merki» memlekettik tabiǵi qaýmaly qurylǵan bolatyn.
Búginde oǵan qarasty orman qory jerleri men Qyrǵyz Alataýy aýmaǵynda qorǵaý jáne kúzetý jumysy óz nátijesin kórsete bastady.
Óńirimizde bury-sońdy bolmaǵan, «Qyzyl kitapqa» engen arqar, úndi jairasy, túrkistan sileýsini, aqbas búrkit sekildi birqatar ań-qustar paida bolyp, sany ósýde.
Munda qorý, kúzetý jumystarynyń barysynda alǵash ret qańtar aiynda 1 qar barysy men 23 arqar quljasynyń BUU baǵdarlamasy aiasynda arnaiy ornatylǵan fototuzaqqa túsip qalǵany belgili boldy.
Osyǵan bailanysty Almaty qalasyndaǵy zoologiia institýtynan arnaiy mamandar kelip, fototuzaq túsirilimderi boiynsha zerdeleý, zertteý jumystaryn júzege asyrǵan.
Nátijesinde qaýmal aýmaǵyndaǵy taý qoinaýyn 4 birdei qar barysy mekendeitinine, sondai-aq, úndi jairasy da bar ekendigine kóz jetkizildi.
Atalmysh institýt mamandarynyń kúshimen Merkidegi bir ǵana taý shatqalynyń ózinen 40 bas arqar men 150 bastan astam taý eshkisiniń úiiri sýretke túsirildi.
Oblystyq orman sharýashylyǵy jáne janýarlar dúniesi aýmaqtyq inspektsiiasynan alynǵan málimetke qaraǵanda, búginde qaýmal aýmaǵyndaǵy arqarlar 140, úndi jairasy 8, qar barysy 8 basqa jetip otyr.
Byltyrǵy jyldan bastap oblys ákiminiń bastamasymen Merki aýdanynyń taýly aimaǵynda memlekettik óńirlik tabiǵi saiabaq qurý isi qolǵa alynǵany barshaǵa málim.
Búginde atalmysh jobanyń jaratylystaný-ǵylymi negizdemesi tolyqtai jasalyp bitti.
Endi tabiǵi saiabaqtyń shekara-shegi belgilenip, tehnikalyq-ekonomikalyq negizdemesi aiasyndaǵy jumystar júzege asyrylý ústinde.
