Germaniia Federativtik respýblikasynyń kantsleri Angela Merkel Aýǵanstandaǵy «Taliban» radikaldy qozǵalysymen kelissózdi bastaýdy usyndy. Germaniia ministrler kabinetiniń basshysy bul málimdemesin jeksenbi, 5 qyrkúiekte Hagende (Soltústik Rein – Vestfaliia) ótken baspasóz konferentsiiasynda jasady, dep habarlaidy QazAqparat DW-ǵa silteme jasap.
GFR kantsleriniń aitýynsha, osyndai dialog muqtaj aýǵandyqtardy evakýatsiialaý úshin qajet.
«Biz elden, atap ótkende nemistiń damytý uiymdarynda jumys istegen, al endi qaýipti jaǵdaida qalyp qoiǵan adamdardy shyǵarǵymyz keledi», - dep qosyp ótti Germaniia úkimetiniń basshysy.
Ol osyndai dialogtiń Aýǵanstanǵa gýmanitarlyq kómek jetkizýdi jalǵastyrýǵa múmkindik beretinin atap ótti. Bul rette nemis saiasatkeri Kabýldaǵy Hamid Karzai atyndaǵy Halyqaralyq áýejaidyń jaqynda ushý úshin qaita ashylǵanyn «jaqsy belgi» dep ataǵan.
«Taliban» radikaldary GFR-men berik diplomatiialyq qatynas ornatýǵa nietti.
GFR-dyń Syrtqy ister ministri Haiko Mas (Heiko Maas) buǵan deiin táliptermen kelissózder júrgizýdi qoldaitynyn jáne olardyń biligi kezinde belgili bir jaǵdaida Aýǵanstanǵa qarjylai kómek kórsetýge bolatynyn málimdedi. Atap ótkende, qarjylai kómek elde tek tálipterden ǵana emes quralǵan úkimet qalyptassa, adam quqyqtary saqtalsa jáne Aýǵanstan «lańkestik qorǵanyna» ainalmasa ǵana kórsetiledi.
«Bizge unasyn, unamasyn, Aýǵanstanda basqa ómir bastaldy. Endi burynǵy jaralardy jamaityn ýaqytymyz joq», - dep málimdedi Mas.
«Taliban» sodyrlary 15 tamyzda Kabýlǵa kirip, al 3 qyrkúiek kúni búkil Aýǵanstandy jaýlap alǵanyn jariialady. Vashington málimetinshe, Aýǵanstandy tálibter jaýlap alǵan kezden beri AUSh jáne onyń jaqtastary elden 122 myńnan astam beibit turǵyndy shyǵarǵan.
