Biyl «Mereili otbasy» ulttyq konkýrsyna 3204 otbasy qatysady, dep habarlaidy QazAqparat.
Alty jylda atalmysh konkýrsqa 15 197 otbasy qatysypty. Onyń 62 paiyzyn - aýyl januialary, 3 paiyzyn - kópbalaly otbasylar, 18 paiyzyn - jas oshaqtar, 17 paiyzyn - eńbek dinastiialary quraǵan. Konkýrsqa qatysýshylardyń sany jyl ótken saiyn ósýde.
QR Mádeniet jáne sport vitse-ministri Eldos Ramazanov biyl qatysatyn 17 otbasynyń árqaisy erekshe ekenin aitty.
«Óńirlik konkýrstardan úzdik shyqqan otbasylardyń jartysynan astamy - kópbalaly. Mysaly, astanamyzdyń namysyn aqyndar otbasy qorǵaidy. Otaǵasy Serikzat Dúisenǵazy besinshi atadan jalǵasqan aqyndyq joldy ustanǵan. Belgili qalamger Serǵazy Rahymov pen «Sábi bolǵym keledi» ániniń sazyn jazǵan Tursynǵazy Rahymov Dúisenǵazinder áýletine týys bolyp keledi. Serikzat aqyn jubaiymen birge 3 bala tárbielep otyr», - deidi ministrlik ókili.
QR Jastar jáne otbasy isteri komitetiniń tóraǵasy Madiiar Qojahmet «Mereili otbasy» konkýrsynyń otbasylyq qundylyqtar quldyrap turǵan zamanda mańyzy zor ekenin aitady.
«Jyl basynan beri 59 555 neke qiylsa, 29 025 ajyrasý faktisi tirkelgen. Ajyrasýǵa minezdiń sáikes kelmeýi, baspana qiyndyǵy, zorlyq-zombylyq, maskúnemdik pen oiynqumarlyq sebep bolýda. Bul tendentsiianyń betin qaitarý úshin 9 óńirde otbasyn qoldaý ortalyǵy ashyldy», - deidi ol.
Al QR Prezidenti janyndaǵy Áielder isteri jáne otbasy-demografiialyq saiasat jónindegi ulttyq komissiia tóraǵasynyń orynbasary Lázzat Súleimen konkýrs alty jyldyń ishinde biik bedelge ie bolǵanyn aitady.
«Biylǵy qatysýshylardyń 80 paiyzy - kópbalaly ári ónegeli otbasylar. «Otan otbasynan bastalady» degen qanatty sóz bar. Memleket basshysy Qasym-Jomart Toqaevtyń Qazaqstan halqyna Joldaýynda otbasy jáne bala institýtyn qoldap, inkliýzivti qoǵam qurýdy basym baǵyt retinde atady. Sonymen qatar, Prezident eń aldymen kópbalaly jáne az qamtylǵan otbasylar úshin otbasylyq biznes ashý máselesi boiynsha úkimetke naqty tapsyrmalar berdi. Osynyń bári Memleket basshysynyń otbasy institýtyna degen qamqorlyǵy», - dedi ol.
Erteń - konkýrs úmitkerlerine daýys berýdiń sońǵy kúni. Al onyń qorytyndysy 7 qyrkúiek kúni jariialanbaq.
