Almaty qalalyq jedel meditsinalyq járdem stansasynyń bas dárigeri Birjan Ospanov Óńirlik kommýnikatsiialar alańynda ótken onlain brifing barysynda aldaǵy mereke kúnderinde koronavirýsty juqtyryp almaý jónindegi usynystarmen bólisti, dep habarlaidy QazAqparat.
«Mereke kúnderi, sonyń ishinde Jańa jyl merekesi kezinde biz árqashan patsientterdiń úlken aǵymyn kútemiz. Sebebi, jylda bolatyn statistikalyq derek osyny kórsetedi. Birinshi kezekte, bul petarda, otshashý jáne taǵy da basqa zattardy qaýipti paidalanǵandaǵy jaraqattarǵa. Odan basqa turmysta bolatyn jaraqattar bar. Sondai-aq, túrli taǵam nemese sýsynnan, ishimikten ýlanyp túsetinderdiń de qatary óte kóp», - dedi Birjan Ospanov.
Sonymen qatar, koronavirýsqa qatysty jaǵdaidy eskere otyryp, Birjan Ospanov almatylyqtardy jappai sharalar ótkizýden bas tartýǵa, sonyń ishinde mereke kezinde basqosýdy shekteýge shaqyrdy.
«Biz jaqyndarymyzben, dostarymyzben aralasyp turǵandy jaqsy kóremiz, ásirese mereke kúnderi olarmen birge bolǵymyz keledi. Qurmetti azamattar, biz sizderden bailanysty shekteýdi, kóp bolyp jinalmaýdy, osylaisha týystaryńyzdy qorǵaýdy suraimyz. Sebebi bul - óte ózekti másele. Týǵandaryńyzǵa janyńyz ashysa, solai etkenińiz jón. Kópshilik is-sharalardy ótkizýden aýlaq bolý kerek. Virýstyń bailanys jasaý jáne aýa tamshylary arqyly taralatynyn este ustaǵan jón. Betperde kiińiz, qolyńyzdy antiseptikpen tazartyńyz, bólmelerdi dezinfektsiialańyz», - dedi ol.
Buǵan deiin Meditsina ǵylymdarynyń kandidaty, Qaraǵandy meditsinalyq ýniversitetiniń Klinikalyq farmakologiia kafedrasynyń meńgerýshisi, professor Sholpan Qalieva koronavirýstan qorǵanýdyń basty faktorlaryn ataǵan bolatyn. Onyń aitýynsha, maska taǵý, áleýmettik qashyqty saqtaý, dezinfektsiia virýstan qorǵaityn basty sharalar bolyp otyr.
«Adamdar aýyra ma, aýyrmai ma oǵan qaramastan kóp bailanysqa túspeýge tyrysý kerek. Adamdar aýyratynyn bilmeýi de múmkin. Sondyqtan, maska taǵýǵa mindetti. Óitkeni maska virýstyń 70 paiyzyn súzedi. Adam juqtyrǵan jaǵdaida da virýs júktemesy de az bolady. Qoǵamdyq oryndarǵa barǵan soń qoldy sanitaizermen tazalaý kerek», - deidi Sholpan Qalieva.
Al Almaty qalasy Psihikalyq densaýlyq ortalyǵynyń direktory Sapar Rahmensheev biyl JRVI, tumaý, koronavirýs qatar júretinin aitqan edi.
«Tumaý belgisin baiqasańyz mindetti túrde emhanaǵa júginý kerek. Ózin-ózi emdeýmen ainalysýdyń qajeti joq. Eń bastysy – dárigerlermen keńesken abzal. Habarlasqannan keiin dárigerler sizdi baqylaýǵa alyp, qajetti emdeýdi taǵaiyndaidy», - dedi ol.
