DAZN strimingilik servisimen kelisimshartqa qol qoiǵan orta salmaqtaǵy álemniń eks-chempiony qazaqstandyq Gennadii Golovkin (38-1-1, 34KO) sporttyq mansabynyń jańa betin bastaitynyn aitty, dep habarlaidy "Ult aqparat".
«Men oraldym! DAZN-men mansabymnyń jańa paraǵyn bastaýǵa jáne meniń muramdy bekite túsýge daiynmyn», - dep jazdy Golovkin Instagramda.
Taraptar kelisimshartqa qol qoiylǵany týraly 8 naýryzda málim etken bolatyn. Qujat úsh jylǵa rásimdelgen. Bul ýaqyt aralyǵynda qazaqstandyq boksshy barlyǵy alty ret, iaǵni jylyna eki jekpe-jekten ótkizedi. Onymen qosa, 2020 jáne 2021 jyldary Golovkin «GGG Promotions» kompaniiasyndaǵy boksshylar úshin DAZN-da tórt boks keshin ótkizý múmkindigine ie bolady.
Gennadii ringke maýsymnyń 8-i nemese 16-sy qaita oralady dep josparlanýda. Onyń qarsylasynyń esimi ázirge belgisiz.
"Baspasózge bergen málimetinde Eddi Hirn Golovkiniń aldaǵy jekpe-jegi týraly kelesi aptada habarlanatynyn aitty. Sonymen birge, Andrade "Rosado — Sýletski" jekpe-jeginde jeńgen boksshymen judyryqtasyp, WBO belbeýin qorǵap qalýǵa tyrysady", - dedi Hirn, dep jazady Talksport.com.
Sports.kz saitynyń jazýynsha, erteń Los-Andjeleste Golovkin men DAZN strimingilik servisi birlesken baspasóz máslihatyn ótkizip, kelisimshart jóninde resmi jariialaityn bolady.
DAZN kompaniiasynyń áleýmettik jelilerde habarlaǵan aqparatyna sáikes, jýrnalistermen júzdesý dúisenbi kúni, jergilikti ýaqyt boiynsha saǵat 16:30-da bastalmaq. Astana ýaqytymen naýryzdyń 11-inen 12-sine qaraǵan túni saǵat 02.30-da.
Esterińizge sala ketsek, budan buryn Gennadii Golovkin "Kanelo" Alvarespen eki ret kezdesti. 2017 jyly 16 qyrkúiekte bolǵan jekpe-jek teńbe-teń aiaqtalsa, qarymta kezdesýde qazaqstandyq sátsizdikke ushyrap, barlyq titýlynan aiyrylyp qaldy.
Byltyr Golovkin sonymen birge IBF chempiondyq belbeýinen aiyrylyp qaldy. Munyń sebebi – GGG ýkrainalyq Sergei Derevianchenkomen judyryqtasýǵa jazbasha kelisimin bermegen.
