Jambyl oblysynyń ákimi Berdibek Saparbaev áleýmettik jelide ózine taǵylǵan aiyptarǵa jaýap berdi, dep habarlaidy Sputnik Qazaqstan.
"Áleýmettik jelide sizge taǵylǵan taǵy bir aiyp: Aqtóbe oblysy ákimi bolyp otyrǵanda, ákimdikke 1,7 million teńgege oryndyq, 500 myń teńgege ydys aldyrypsyz. Osy ras pa?" dep surady jýrnalist Nartai Aralbaiuly YouTube-kanalyndaǵy suhbatynda.
"Birinshiden ol meniń esimde joq. Ekinshiden, ondai aqymaq emespiz ǵoi. Ony jazǵan adam dáleldesin. Kim aldy, kim tapsyrys berdi, aqsha qaidan ketti. Olai bolýy múmkin emes", - dep jaýap berdi Berdibek Saparbaev.
Ákim jala japqandardy sotqa berip, óz abyroiyn túsirgisi kelmeitinin aitty.
"Qazaqta "it úredi, kerýen kóshedi" degen sóz bar. Oilanarmyn áli. Biraq men sondailardyń aldynda óz abyroiymdy túsirgim kelmeidi. Maǵan da ońai emes, árine. Otyz jyl eńbek etip kele jatyrmyn. Taza, ádil eńbek etip jatyrmyn dep oilaimyn. Qazaqstannyń jartysyn, Qyzylordanyń toqsan protsentin maǵan ilip qoia bergen... Bilmeimin, tipti. Men ótkende sizdiń áriptesińizge "eger men milliarder bolsam, ákim bolmas edim" dep aityp edim. Ne keregi bar maǵan?! Árine, meniń júregime batady. Biraq árkimniń óz ar-uiaty, namysy bilsin", - dedi oblys ákimi.
Saparbaev jala jabýdyń kóbisi kóre almaýshylyqtan shyǵatynyn atap ótti.
Berdibek Saparbaev týraly ne bilemiz?
Berdibek Máshbekuly Saparbaev 1953 jyly 9 aqpanda Qyzylorda oblysy Jańaqorǵan aýdany Besaryq aýylynda týǵan. 1977 jyly Almaty halyq sharýashylyǵy institýtyn ekonomist mamandyǵy boiynsha támamdaǵan.
Ár jyldary ministrler kabineti apparatynyń jetekshisi, Qyzylorda, Ońtústik Qazaqstan oblystarynyń ákimi, kedendik baqylaý agenttigi tóraǵasy, qarjy ministriniń orynbasary qyzmetin atqarǵan.
2009 jyldyń 4 naýryzynan bastap 2014 jyldyń 11 qarashasyna deiin Shyǵys Qazaqstan oblysynyń ákimi boldy. 2014 jyldyń qarasha aiynan 2015 jyldyń 11 qyrkúiegine deiin premer-ministrdiń orynbasary qyzmetin atqardy.
Aqtóbe oblysyn basqardy. 2019 jyldyń 25 aqpanynan 20 tamyzyna deiin eńbek jáne halyqty áleýmettik qorǵaý ministri boldy. Al 20 tamyzdan 10 aqpanǵa deiin – úkimet basshysynyń orynbasary.
2020 jyldyń aqpanynan Jambyl oblysynyń ákimi.
Úilengen, úsh bala tárbielep ósirdi.
