© Skrinshot video YouTube / Almaty oblysy ákiminiń baspasóz qyzmeti
Taldyqorǵan ákimi Áset Masabaev Aýǵan soǵysy ardagerlerimen kezdesti. Qos tarap arasynda daý týyndap, qala basshysy ózine qarsy petitsiia jazýdy usyndy, dep habarlaidy Sputnik Qazaqstan.
Resmi málimetke sáikes, ákimniń qabyldaýyna kelgen ardagerler turǵyn úi kezegi, jer kezegi, saýyqtyrý ortalyqtaryna joldama alý men qoǵamdyq avtobýstardaǵy tegin júrý máselesin kóterdi. Turǵyn úi qorynan páter nemese jer taratyp berýdi surady. Al qala ákimi Áset Masabaev páter men jer tek kezek boiynsha beriletinin jetkizdi.
"40 páter qaita alyp jatyr, olar kimge taratylady, "aýǵandyqtarǵa" taratylmai ma deidi. Bul páterler kópbalaly analarǵa, jetim balalarǵa, odan keiin múgedek balany tárbielep otyrǵan otbasylarǵa beriledi. Ashyq aitaiyn, aýǵandyqtarǵa joq", - dep atap kórsetti Masabaev.
Osy oraida Taldyqorǵan basshysy zańsyz alynǵan páterler de bar ekenin aitty. Kópbalaly otbasy bolyp tirkelgen alaiaqtar da joq emes. Qazir tekseris sharalary júrgizilip jatyr.
10 qyrkúiekke deiin memlekettik qyzmetkerlerge berilgen páterler tekseriledi. Odan keiin áleýmettik jaǵynan osal toptarǵa taratylǵan baspananyń zańdylyǵy zerdelenedi. Masabaevtyń aitýynsha, negizgi maqsat – tarysy men bidaiyn ajyratyp alý.
Kezdesý kezinde keibir máseleler qyzý talqylandy. Sol kezde eki jaq ta emotsiiaǵa berildi. Masabaev ózine qarsy petitsiia jazýdy da usyndy "Meniń jumysyma qanaǵattanbasańyzdar, Masabaev ketsin dep petitsiia jazyńyzdar. Men ketemin", - dedi Masabaev.
Aita keteri, Taldyqorǵan qalasynyń ákimi Áset Masabaev arnaiy monitoringtik top quryp, buryn taratylǵan páterlerge inventarizatsiia jasaýdy tapsyrǵan. Tekseris kezinde 1 066 páterdi bergende zań talaptary buzylǵany anyqtaldy.
Ákimdik 37 páterdi memleketke qaitardy. Oǵan ielik etkenderdiń arasynda qazirgi jáne burynǵy memlekettik qyzmetshiler bar. Almaty oblysynyń burynǵy ákimin tasyǵan kólik júrgizýshisine de qyzmettik páter zań buzýshylyqpen berilgen. Ol kiltin óz erkimen kelip tapsyrdy.
