«Men qazaqpyn» atty xalyqaralyq megajobanyń aiasynda Almaty jáne Mańǵystaý oblystarynda irikteý sharalary bastaldy. Baiqaýdyń negizgi maqsaty - qazaq xalqynyń tól óneri, sonyń ishinde jyr-termeler men kúilerdi búgingi zaman talabyna sai jańartyp, óskeleń urpaqqa jetkizý, dep xabarlaidy QazAqparat.
Joba aiasynda arnaiy top árbir oblysty aralap, qatysýshylardy irikteidi. Odan ótkender televiziialyq baiqaýǵa joldama alady. Qatysýshylardyń jas ereksheligi - 18 ben 40 jas aralyǵy. Sondai-aq saxnaǵa shyǵatyn ónerpazdardyń kiimi qazaqy úlgide ári búgingi zaman talabyna sai bolýy tiis.
«Búgin Almatydaǵy irikteý týrlary saǵat 11:00-de «Alataý» dástúrli óner ortalyǵynda bastalady. Al Aqtaýda saǵat 14:00-de Mádeniet saraiynda ótedi», - dedi «Qazaqstan» RTRK prodiýsseri Qýanysh Sultanuly QazAqparat tilshisine bergen suxbatynda.
Jobaǵa Qazaqstan azamattarynan bólek, Resei, Qytai men Mońǵoliia jerinde turatyn qandastarymyz da qatysa alady. Atap aitqanda, Altai respýblikasynyń Qosaǵash aýdanynda irikteý týrlary ótkiziledi. Budan bólek, Baian-Ólgei men Shyńjań-Uiǵyr avtonomiialyq ólkesinde irikteýler uiymdastyrylady. Ol jaqtaǵy sharalar shilde aiynda bastalady.
Aita keteiik, ótken aida «Men qazaqpyn» xalyqaralyq baiqaýyna arnalǵan baspasóz máslixaty uiymdastyrylǵan bolatyn. Sol jerde uiymdastyrýshylary baiqaýdyń alǵashqy irikteý týrlarynyń 5 maýsymda bastalatynyn jariialaǵan. Osydan keiin kórermen qaýym baiqaýdyń kúndeligi men negizgi konkýrsyn teledidardan kóre alady. Jeńimpazdar «Jyldyń eń úzdik dástúrli ánshisi», «Jyldyń eń úzdik termeshisi» jáne «Jyldyń eń úzdik kúishisi» atalymdary boiynsha marapattalady.
«Elbasy rýxani jańǵyrý jónindegi jalpyulttyq ideiany jariialaǵanda jańǵyrý úderisi mindetti túrde eldiń ulttyq rýxani tamyrynan nár alýy tiis ekenin atap ótken bolatyn. Bizdiń rýxani tamyrymyz - ata-babadan miras bolyp qalǵan saltymyz, tilimiz ben mýzykamyz, ádebietimiz desek, sonyń ishinde dástúrli ánshilik, kúishilik jáne termeshilik ónerdiń orny erekshe. Osy biregei ónerdi laiyqty dáripteý - eldik, birlik ideiasyn iske asyrýdyń asa utymdy quraly. Osyny eskere otyryp, biz, ministrlik pen «Qazaqstan» ulttyq arnasy, «Men qazaqpyn» atty televiziialyq megajobany usynyp otyrmyz. Jobanyń maqsaty - dástúrli ánshi, termeshi men kúishilerimizdi, elimizdiń árbir aimaǵynda qalyptasqan óner mektebiniń ókilderin keńinen dáripteý, tańdaýly týyndylardy óskeleń urpaqqa zamanaýi formatta nasixattaý», - deidi QR Aqparat jáne kommýnikatsiialar ministri Dáýren Abaev.
