© Sputnik / Vladislav Vodnev
Senat depýtattary burynǵy áriptesi Beibit Isabaevty shyǵaryp saldy, dep habarlaidy Sputnik Qazaqstan.
Jaqynda Isabaev jańadan qurylǵan Jetisý oblysynyń ákimi qyzmetine taǵaiyndalǵan bolatyn. Osyǵan bailanysty Ortalyq sailaý komissiiasy onyń depýtattyq ókilettigin toqtatty. Al Beibit Isabaev burynǵy áriptesterine alǵysyn aitty.
"Men ómir boiy memlekettik qyzmette júrmin, bir kún de kásipkerlik salada jumys istegen joqpyn. Ýniversitetti bitirgennen bastap memlekettik qyzmette kele jatyrmyn. Sol memlekettik qyzmettiń bir úlken tarmaǵy – bul ókiletti zań shyǵarý biligi, parlament. Osy parlamentte az ýaqyt bolsa da, jarty jyldai birge jumys istedik, áriptesterim maǵan senim bildirip, komitet tóraǵasy etip sailady. Ol senimderińizdi aqtaýǵa tyrystym, azdy-kópti sińirgen eńbegimdi baǵalap, marapat kórsetip jatqandaryńyzǵa rizashylyǵymdy bildiremin. Bárimiz memlekettik qyzmette júrgennen keiin elimizde bolyp jatqan jańalyqtarǵa, reformalarǵa, ózgeristerge atsalysyp, halyqqa, elge, jerge birge qyzmet eteiik", - dedi Isabaev.
Senat tóraǵasy Máýlen Áshimbaev oǵan qurmet gramotasyn tapsyryp, áleýmettik-mádeni damý jáne ǵylym komitetiniń basshysy qyzmetinde atqarǵan eńbegi úshin alǵys aitty.
Búgin komitettiń jańa basshysy bolyp depýtat Nariman Tóreǵaliev sailandy.
