Memlekettik satyp alýdyń «elektrondy dúken» túri engiziledi. Bul týraly búgin Májiliste «Memlekettik satyp alý máseleleri boiynsha keibir zańnamalyq aktilerine tolyqtyrýlar men ózgerister engizý týraly» zań jobasynyń tanystyrylymynda QR Qarjy vitse-ministri Rýslan Beketaev aitty, dep habarlaidy QazAqparat tilshisi.
«Osy negizdemeni (jańartý tártibimen shyǵarylatyn memlekettik materialdyq rezervtiń materialdyq qundylyqtaryn satyp alý; QR zańnamasynda aiqyndalǵan tulǵadan múlikti senimgerlik basqarý jónindegi qyzmetterdi satyp alý; 100 AEK deiin taýarlardy, sondai-aq 500 AEK deiin jumystar men qyzmetterdi satyp alý) alyp tastaý «elektrondyq dúken» túrinde satyp alýdyń jańa tásilin engizý jolymen óteletin bolady. Ol mundai taýarlardy, jumystardy 1 jumys kúni ishinde básekelestik negizde satyp alýǵa múmkindik beredi», - dedi vitse-ministr.
Bul rette Taýarlardy elektrondyq dúken arqyly satyp alýdy memlekettik satyp alý veb-portaly arqyly jumys istep turǵan internet-dúkender bazasynda júzege asyrý usynylady.
«Memleket basshysynyń qaǵaz qujat ainalymyn alyp tastaý jáne tolyq tsifrlandyrý jónindegi saiasatyn eskere otyryp, sondai-aq elektrondyq kommertsiiany damytý jaǵdaiynda osy tásildi engizý óte ózekti bolyp tabylady. Usynylatyn elektrondyq dúken tetigi tapsyrys berýshige taýardy, jumysty nemese qyzmetti tańdaýǵa múmkindik beredi. Bul rette ónim berýshini anyqtaý naryqtaǵy eń úzdik sharttar boiynsha qolda bar usynystar negizinde júrgiziledi», - dedi Rýslan Beketaev.
