2018 jyly memlekettik organdardyń málimetter bazasynda 5 mln qatelik anyqtaldy. Bul týraly búgin Májilistegi «Salyqtyq jáne kedendik ákimshilendirýdegi tsifrlyq tehnologiialar» atty Úkimet saǵatynda Qarjy ministri Álihan Smaiylov aitty, dep habarlaidy QazAqparat tilshisi.
Otyrys barysynda Májilis deptýtaty Tatiana Iakovlevanyń aitýynsha, áli kúnge deiin azamattar elektrondy úkimet portalyndaǵy, Memlekettik kirister komitetiniń nemese onyń aýmaqtyq bólimsheleriniń saityndaǵy qate málimettermen betpe-bet kelip otyr.
«Ózim de qate tsifrlarmen betpe-bet kelip qalǵanym bar. Qate málimetter problemasyna azamattar, ásirese, 2018 jyldyń jazynda bankter salyqtyq bereshegi bar klientterge qyzmet kórsetpeitindigin týraly norma kúshine engennen keiin tap boldy. Osyǵan bailanysty kóptegen azamattar bank esepshottaryn asha almady, nesie ala almady jáne ózderiniń qaryzdary joq ekendikterin dáleldeýge májbúr boldy. Iaǵni, adal salyq tóleýshiler sizderdiń aqparattyq júielerińizdegi kemshiliktiń tutqynyna ainaldy», - degen depýtat Qarjy ministri Álihan Smaiylovtan bul kemshilikter qashan joiylatyndyǵyn suraǵan edi.
Qarjy ministriniń aitýynsha, atalǵan normany qoldaný barysynda úsh problema anyqtalǵan. Birinshisi - tehnikalyq. Ekinshisi - ókiletti organdardyń málimetter bazasyndaǵy derekterdiń barynsha ózektendirilmeýi. Úshinshisi - qate rekvizitter saldarynan salyq tóleýshilerdiń salyqtyq beresheginiń bolýy.
«Ótken jyly bul problemaǵa tap bolǵannan keiin ózektendirý boiynsha aýqmdy jumys júrgizdik. Ótken jyldyń ishinde óte úlken málimetterdi tekserip shyqtyq. Túrli memlekettik organdardyń málimetter bazasynda 5 millionnan astam qatelik anyqtalyp, birlesken jumys barysynda onyń shamamen 4,7 milliony ózektendirildi. Iaǵni, túzetildi. Áli de shamamen 300 myń qatelik bar. Bul qatelikter salyq tóleýshiniń óziniń qatysýymen ǵana túzetiledi. Sondyqtan qazirgi ýaqytta jergilikti atqarýshy organdarmen, sáikesinshe ókiletti organdarmen birge jyldyń sońyna deiin úi-úidi aralaýdy josparlaýdamyz. Sebebi salyq tóleýshiniń ózi kelgenin kútý durys ádis emes siiaqty. Jyldyń sońyna deiin bul problemany túbegeili sheshemiz», - dedi Álihan Smaiylov.
Buǵan deiin, Májilis depýtaty Gúljan Qaraqusova salyqtyq ákimshileýdegi kemshilikterdi ataǵan bolatyn.
