Búgin Prezident Konstitýtsiiaǵa sai Qazaqstan halqyna óz Joldaýyn jariialady. Kópten kútilgen qujatta memleketimizdiń damýyna, keleshegine qatysty eń mańyzdy máseleler túgelimen derlik qamtyldy. Bul pikirdi Memleket basshysynyń baspasóz hatshysy Rýslan Jeldibai áleýmettik jelidegi paraqshasyna jazdy, dep habarlaidy "Ult aqparat".
"Buǵan deiin habarlaǵanymdai, Joldaýda áleýmettik-ekonomikalyq salaǵa erekshe nazar aýdaryldy. Eń aldymen, áleýmettik salada azamattardyń jan-jaqty qorǵalýy úshin birneshe bastama kóterildi. Sońǵy kezde áielderdiń zeinet jasyn ózgertý máselesi qoǵamda jii kóterilgeni jasyryn emes. Endi Prezident sheshimimen áielderdiń zeinet jasy 2028 jylǵa deiin 61 jas deńgeiinde qalady.
Sondai-aq Joldaýda ana men bala máselesine basa nazar aýdaryldy. Naqty aitsaq, bala kútimi úshin tólemaqy sábi 1,5 jasqa tolǵanǵa deiin tólenedi. Iaǵni, bala kútip otyrǵan úidegi anany qoldaý mańyzdy.
Al «Ulttyq qor – balalarǵa» baǵdarlasy boiynsha Ulttyq qordyń jyl saiynǵy investitsiialyq tabysynyń 50 paiyzy balalar kámelet jasqa tolǵanǵa deiin olardyń arnaiy shotyna túsip turady. Qarajat sheteldik valiýtada saqtalyp, infliatsiiadan qorǵalady. Basqasha aitsa, barlyǵymyzǵa ortaq Ulttyq qor kapitaly halyq múddesi úshin, jańa urpaqty qarjylai qoldaý úshin jumsalady.
Kelesi mańyzdy bastama - «Samuryq-Qazyna» qory taza paidasynyń keminde 7 paiyzyn «Qazaqstan halqyna» qoǵamdyq qoryna aýdaratyn boldy. Atalǵan qor qoǵamdaǵy áleýmettik álsiz jandarǵa qoldaý kórsetip jatqany belgili. Endi ulttyq ál-aýqat qorynyń qarajaty sonda jumsalyp, onyń igiligin qatardaǵy azamattar da kóredi" - deidi Jeldibai.
Onyń jazýynsha, bul da - áleýmettik ádildik pen teńdikti ornatýdyń bir quraly.
"Prezident sondai-aq Úkimetke jastarǵa arnalǵan jańa 100 myń jumys ornyn ashýdy, olarǵa kásibin ashý úshin 2,5 paiyzdyq jeńildetilgen nesie berýdi tapsyrdy. Iaǵni, jas órender maman, kásipker retinde qalyptasyp, qoǵamnyń tolyqqandy múshesine ainalýy tiis. Bul - jastarǵa balyq emes, qarmaq berýdiń bir tásili.
Qasym-Jomart Toqaev biylǵy Joldaýda Ádiletti Qazaqstannyń is júzinde ornaýyn basshylyqqa aldy desem, artyq emes. Mysaly, áli de igerilmei bos jatqan nemese zańsyz berilgen jer kólemi 10 million gektarǵa jýyqtaidy. Onyń kemi 5 million gektaryn biyl memleket menshigine qaitaryp, halyq igiligine berý josparlanyp otyr. Sebebi referendýmda azamattar «jer iesi - halyq» degen bapqa daýys berdi.
Áleýmettik ádildikti ornatý úshin endi jemqorlardyń zańsyz tapqan aqshasy mektep qurylysyna jumsalady.
Qoǵamda ádiletti ornatatyn – sot. Mine, sol sottyń táýelsizdigi asa mańyzdy mindet. Sýdialardyń táýelsizdigin qamtamasyz etý úshin Prezident Sot tóraǵasy jáne Sot alqasynyń tóraǵasyn sailaýdy usyndy. Taǵaiyndalǵan sýdia men sailanǵan sýdianyń aiyrmashylyǵy mol ekenin sheteldik tájiribe dáleldep keledi" - deidi Prezident baspasóz hatshysy.
Onyń sózinshe, biyl ekonomikamyz kúrdeli kezeńderdi ótkerdi. Sondyqtan Joldaýda ekonomikalyq blok ta basty nazarda boldy.
"Kelesi jyly jańa Salyq kodeksi ázirlenedi. Talai kásipkerdiń isin dóńgeletýge yqpalyn tigizip otyrǵan memlekettik satyp alý salasyn odan ári ashyq etý úshin jańa zań qabyldanady. Ekonomikamyzǵa jańa investorlar tartý úshin 300 myń dollardan kóbirek investitsiia quiǵan shetel azamattaryna 10 jylǵa viza rásimdeledi. Monopolist operatorlardyń qyzmeti baqylaýǵa alynady. Iaǵni, shekten tys monopoliiamen kúres jalǵasa beredi.
Ózderińiz kórip otyrǵandai, Prezident ózi sailanǵan merzimnen beri basshlyqqa alǵan ádilettilik, áleýmettik teńdik, ashyqtyq syndy qundylyqtardy júieli túrde naqty sheshimderge, zańdarǵa ainaldyrýdy jalǵastyryp keledi.
Bul - Ádiletti Qazaqstandy ornatýdyń birden bir alǵysharty. Búgingi Joldaý sonyń naqty dáleli" - dep túiindedi ol óz jazbasyn.
