Memlekettik tilge degen qoǵamnyń suranysy artyp keledi. Bul týraly Ortalyq kommýnikatsiialar qyzmetinde «Ulttyq rýhani jańǵyrý» ulttyq jobasynyń maqsatyn túsindirý kezinde QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
Ministrdiń aitýynsha, birinshi baǵyt - Elbasynyń baǵdarlamalyq maqalasynda qamtylǵan ideialardyń «Rýhani jańǵyrý» qundylyqtaryn ary qarai ilgeriletý. Osy oraida memldekettik tildi damytý mindeti jekelei belgilengen.
«Jalpy, osy blok boiynsha 38 joba josparlanǵan. Olardyń túpki maqsaty - ulttyń shyǵarmashylyq ári ziiatkerlik áleýetin qoldaý men damytý. Bul baǵyttyń ekinshi mańyzdy mindeti – memlekettik tildiń qoldaný aiasyn keńeitý. Óitkeni, «ultty saqtaý» degenimizdiń ózi – tildi saqtap, damytý ekeni belgili. Memleket basshysy qazaq tiliniń bolashaqta – ultaralyq tilge ainalatynyna senim bildirgenin bilesizder. Oǵan búginde barlyq negiz bar. Memlekettik tilge degen qoǵamnyń suranysy artyp keledi. Bul – ýaqyt talaby», - dedi A. Balaeva.
Osy oraida ol bul máselede birqatar aýqymdy joba qarastyrylyp otyrǵanyn jetkizdi.
«Atap aitqanda, memlekettik tildi oqytý boiynsha innovatsiialyq IT-ónimder ázirleý, tanymal animatsiialyq jáne tanymdyq arnalardy qazaqshalaý, orta bilim berýdiń tilge qatysty baǵdarlamalaryna ózgerister engizý, tehnikalyq jáne kásiptik bilim berý uiymdary úshin qazaq tilindegi oqýlyqtar ázirleý siiaqty júieli is-sharalar bar. Bir sózben aitqanda, maqsatymyz – qoǵamdaǵy qazaqtildi ortany barynsha keieitý, ony turmysta ǵana emes, ǵylym men bilimniń, biznes pen áleýmettiń tiline ainaldyrý», - dedi ministr.
