QR Ádilet ministri Marat Beketaev memlekettik sot oryndaýshylar nege qysqartylǵanyn túsindirdi, dep habarlaidy "Ult aqparat".
«Sot aktilerin oryndaý qyzmetin jetildirý boiynsha qabyldanǵan sharalar jáne osy institýtty odan ári damytý taqyrybyna toqtalmaqpyn. Úsh millionnan astam azamat nemese elimizdiń altydan bir bóligi jyl saiyn májbúrlep oryndatýǵa mindetteledi. Bul atqarýshylyq is júrgizý salasynyń naqty aýqymy. Sondyqtan ony odan ári damytý azamattardyń múddelerin esepke alý turǵysynan júzege asyrylyp keledi. Bul institýttyń biznes úshin de mańyzy zor. Óndirip alýshynyń talaptaryn boryshkerdiń quqyqtaryn kemitpei qanaǵattandyrý, ýaqyt shyǵyndaryn qysqartý, halyqqa yńǵaily etý jáne tsifrlandyrý atqarýshylyq is júrgizýdi jetildirý jolyndaǵy basty maqsattar boldy. Bul maqsat kezdeisoq tańdalǵan joq. Sebebin anyqtaý úshin bes jyl buryn bolǵan jaǵdaidy qaraiyq. Ol ýaqytta problemalar kóp boldy», - dep toqtaldy ministr Parlament Májilisindegi Úkimet saǵatynda.
Osy oraida ol atqarý paraǵynyń joǵalyp ketýi; balalardy qamtamasyz etýdi qosa alǵanda, bereshekti óndirýdiń tómen deńgeii, májbúrleý sharalaryn ýaqtyly qabyldamaý jáne bereshek jabylǵannan keiin olardyń sheshilmeýi, sot oryndaýshysy tarapynan óz jumysyna qyzyǵýshylyq tanytpaýy, boryshkerdiń múliktik jaǵdaiyn tez anyqtaý múmkindiginiń joqtyǵy, taraptarda is júrgizý barysy týraly aqparattyń joqtyǵy sekildi máseleler bolǵanyn atap ótti.
«Qordalanǵan máselelerdi sheshýdiń birinshi kezeńi retinde jeke oryndaýshy júiesine kóshýdi atap ótken jón. Bul óz kezeginde ahýaldy aitarlyqtai ońtaily etýge múmkindik berdi. Bul turǵyda istiń nátijesi boiynsha sot oryndaýshysynyń qyzyǵýshylyǵy máselesi ishinara sheshildi. Munymen qosa, Ult josparynyń 27-qadamy aiasyndaǵy ekinshi kezeń sot oryndaýshysy institýtyn ary qarai damytýǵa tyń serpin berdi», - dedi M. Beketaev.
Onyń sózine qaraǵanda, 2016 jyldan jeke sot oryndaýshylaryna aýqymdy somada memlekettik múddesine qatysty isterden basqa barlyq qujattardy oryndaý boiynsha ókilettik berildi. Atalǵan memlekettik múddege bailanysty qujattarmen memlekettik sot oryndaýshylary ainalysady.
«Memlekettik sot oryndaýshylarynyń sany kóp bolýyna orai, ońtailandyrý sharalary júrgizilip, olardyń sany tórt esege qysqardy, iaǵni 1245-ten 303-ge deiin. Jeke sot oryndaýshylarynyń sanyn úsh esege, 2200-ge deiin arttyrýǵa múmkin boldy. Bul óz kezeginde Respýblika biýdjetinde 1,4 mlrd teńge shamasyndaǵy qarjyny únemdeýge jol berdi», - dedi Marat Beketaev.
