Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine memlekettik satyp alý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
«Zań jobasy 2019 jylǵy 21 tamyzda Tuńǵysh Prezident-Elbasynyń «Nur Otan» partiiasynyń keńeitilgen otyrysynda bergen tapsyrmasyn jáne Memleket basshysynyń Sailaýaldy baǵdarlamasynda memlekettik satyp alýdy jetildirýge qatysty bergen tapsyrmasyna sáikes ázirlendi. Zań jobasyna engiziletin túzetýler 3 negizgi bólikten turady: memlekettik satyp alý zańnamasyn jetildirý, sybailas jemqorlyq táýekelderin tómendetý, bir kózden satyp alýdy azaitý», - dedi QR Qarjy ministri Erulan Jamaýbaev.
Onyń aitýynsha, memlekettik satyp alý zańnamasyn jetildirý aiasynda konkýrs túrindegi satyp alýdyń jańa tásili retinde aldyn ala kelisimdi qoldaný qarastyrylǵan. Bul tásil 2 kezeńnen turady.
«Birinshi kezeńde talaptarǵa sáikes keletin áleýetti ónim berýshiler iriktelip, olarmen aldyn ala kelisim jasalady. Ekinshi kezeńde tapsyrys berýshiler aldyn ala kelisimniń qatysýshylaryna taýarlar, jumystar men qyzmetterdi satyp alýǵa tapsyrys jiberedi. Kelisimshart eń tómen baǵa usynǵan áleýetti ónim berýshimen jasalady. Ádette, aldyn ala kelisim jasasý arqyly kantseliarlyq jáne sharýashylyq taýarlary, tehnika, janar-jaǵarmai, bailanys qyzmeti men internet jelisine qosylý jáne sol siiaqty standartty taýarlar men qyzmetter satyp alynady», - dedi ministr.
Usynylyp otyrǵan ádis satyp alý rásimderin 5 jumys kúnine deiin azaitýǵa múmkindik beredi.
Budan bólek, sybailas jemqorlyq táýekelderin tómendetý aiasynda zań jobasymen Reitingtik-baldyq júie arqyly konkýrs tásilin engizý usynylady. Atalǵan tásil memlekettik satyp alý rásimine adamnyń qatysýyn shekteýge, satyp alýdy konkýrstyq komissiiasyz júzege asyrýǵa múmkindik beredi. Bir kózden satyp alýdy azaitý aiasynda qujat bir kózden satyp alýdyń 52 negizdemesiniń úsheýin qysqartýdy kózdep otyr.
«Bul rette, quny 100 ailyq eseptik kórsetkishten aspaityn bir kózden satyp alýlar joiylyp (39-baptyń 3-tarmaǵynyń 42) tarmaqshasy), osyndai satyp alýlar Elektrondy dúken arqyly satyp alýdyń jańa tásilimen orny toltyrylady. Elektrondy dúkenniń ereksheligi tapsyrys berýshige ózine qajetti taýardy tańdaý erkindigin beredi jáne mundai taýardyń jetkizip berýshisi eń tómen baǵa negizinde anyqtalady. Bul bir jaǵynan, sapaly taýarlardy satyp alýǵa múkindik berse, ekinshi jaǵynan, tapsyrys berýshiler men ónim berýshiler tarapynan táýekelder men teris paidalaný jaǵdailaryna jol bermeidi», - dedi Erulan Jamaýbaev.
