QR Qarjy ministriniń mindetin atqarýshy Berik Sholpanqulov «Qarapaiym zattar ekonomikasy» baǵdarlamasyn iske asyrýda qandai sharalar jasalǵanyn aityp berdi, dep habarlaidy QazAqparat.
Qarjy ministrligi múddeli memlekettik organdarmen jáne «Atameken» Ulttyq kásipkerler palatasymen birlesip, jergilikti qamtýdy qoldaý boiynsha turaqty jumys júrgizýde.
«Otandyq óndirýshilerdi qoldaý maqsatynda mynadai sharalar qabyldandy. Birinshiden, ulttyq rejimnen alyp tastaýdy belgileý boiynsha Úkimettiń 2 qaýlysy qabyldandy. Alǵashqysy – avto, transformatorlar jáne kabelder, ekinshisi – jeńil ónerkásip taýarlary, jihaz jáne tsement. Ekinshiden, kórsetilgen atalymdar aldyn ala biliktilik irikteý (ABI) arqyly konkýrs tásilimen ǵana satyp alynatyn taýarlar tizbesine engizildi. Aldyn ala biliktilik irikteýinen ótýdiń negizgi kriteriii – indýstriialyq sertifikattyń bolýy», - dedi B. Sholpanqulov Úkimet otyrysynda.
Úshinshiden, Memlekettik satyp alý týraly zańda tapsyrys berýshilerdiń tehnikalyq erekshelikterde ulttyq standarttardy kórsetý mindeti belgilendi.
Tórtinshiden, otandyq taýar óndirýshiler tizimine engizilgen qurylys materialdaryn paidalanýdy kózdeitin qurylys salasyndaǵy jumystardy memlekettik satyp alý týraly úlgilik sharttar bekitildi.
«Jergilikti qamtýdy odan ári damytý barysynda Parlamenttegi memlekettik satyp alý máseleleri boiynsha zań jobasynda mynadai túzetýler anyqtalýda: birinshiden, memlekettik satyp alýlarda taýarlardy kepildi satyp alýdy (offteik-kelisimsharttar) paidalaný; ekinshiden, ulttyq standarttarǵa, Indýstriialyq sertifikattarǵa jáne ST-KZ sertifikattaryna bailanystyrý arqyly, retteletin satyp alýdyń barlyq túrleri úshin biryńǵai kodifikatsiiany paidalanyp, taýarlardyń elektrondyq katalogyn engizý. Úshinshiden, memlekettik satyp alýlardy tolyq ortalyqtandyrýǵa kóshý, bul jergilikti qamtýdy arttyrý máselelerin ortalyqtan retteýge múmkindik beredi. Bul rette atalǵan sharalardyń ishinen otandyq óndirýshilerdi qoldaýdyń eń tiimdi mehanizmi ulttyq rejimnen alyp tastaýdy belgileý ekenin atap ótken jón. Sondyqtan beiindi ministrlikterge osy quraldy neǵurlym belsendi paidalaný usynylady», - dedi Berik Sholpanqulov.
