Pavlodar oblysynda aýyl turǵyny memlekettik rámizderge til tigizgeni úshin qamaýǵa alyndy. Ol mas kúiinde bolǵan, óz is-áreketin baqylaýda ustai almai, áleýmettik jelide QR Memlekettik rámizderiniń atyna beiádep sózder aitqan, dep habarlaidy "Ult aqparat".
«Besinshi maýsym kúni Pavlodar aýdanynyń politsiiasyna oblys ortalyǵynyń 42 jastaǵy turǵyny habarlasyp, áleýmettik jeli paidalanýshysyn ákimshilik jaýapkershilikke tartýdy ótindi. Mundai shaǵymynyń sebebi er adamnyń Instagram-daǵy Qazaqstan Respýblikasynyń Memlekettik rámizderiniń atyna ádepsiz sóileýi boldy, osylaisha aýyl turǵyny Memlekettik rámizderge qurmet kórsetpedi», - dedi Pavlodar oblysy Pavlodar aýdany politsiia bóliminiń bastyǵy Dýlat Tókenov.
Óńirdiń politsiia departamentiniń baspasóz qyzmeti tártip buzýshynyń anyqtalyp, ustalǵanyn atap ótti. Ol Pavlodar aýdany Efremovka aýylynyń 38 jastaǵy turǵyny bolyp shyqty. Er adam óziniń qateligin mas kúiinde bolýymen jáne áreketterin baqylamaýymen túsindirdi.
«Aýyl turǵynyna qatysty tártip saqshylary QR ÁQBtK-niń 434-baby 1-tarmaǵy («Usaq buzaqylyq» baby) boiynsha ákimshilik is qozǵady. Material sotqa jiberildi. 2021 jylǵy 6 maýsymda onlain rejimde sot ótti. Sot otyrysynda aýyl turǵyny ákimshilik quqyq buzýshylyq týraly hattamada baiandalǵan mán-jailardy rastai otyryp, jasalǵan quqyq buzýshylyq kinásin moiyndady. Sot kináli adamdy QR ÁQBK 434-babynyń 1-tarmaǵynda kózdelgen ákimshilik quqyq buzýshylyq jasaǵany úshin kináli dep tanydy jáne 1 (bir) táýlik merzimge ákimshilik qamaýǵa alý túrinde ákimshilik jazaǵa tartty», - dep atap ótti politsiia.
