Memleket basshysy Qasym-Jomart Toqaev óńir ákimderiniń qatysýymen ótken keńeste eldiń ekonomikalyq damýyna qatysty birqatar tapsyrma berdi. Bul týraly QR Prezidentiniń baspasóz hatshysy Berik Qurmanǵali feisbýktaǵy paraqshasynda jazdy, dep habarlaidy "QazAqparat".
«Memleket basshysy ekonomikanyń ósýi men ártaraptandyrylýyna qol jetkizýdegi basty faktorlar retinde investitsiiany, eksportty jáne indýstriialandyrýdy atap ótti. Osyǵan bailanysty memleket pen biznestiń, sondai-aq ortalyq pen óńirlerdiń úilesimdi jumys isteý qajettigi atalyp ótti», - dep jazdy baspasóz hatshysy.
Q.Toqaev jekelegen óńirlerde iskerlikke qolbailaý bolatyn ákimshilik kedergiler men shekteýler máselesine nazar aýdardy.
«Odan bólek, Memleket basshysy, tartylǵan investitsiialar men shikizattyq emes eksport kóleminiń ministrler men ákimderdiń qyzmetin baǵalaýdyń negizgi kórsetkishteri bolatynyn málimdedi. Sondyqtan Prezident Ákimshiligine memlekettik organdardyń qazirgi baǵalaý júiesine tiisti ózgerister engizý tapsyryldy», - deidi Berik Qurmanǵali.
