Memlekettik organdarda áreket etý men sheshim qabyldaýda erkindik bolýy tiis. Mundai pikirdi Qarjy ministrligindegi «Adaldyq alańy» jobalyq keńsesiniń basshysy Oljas Qudaibergenov bildirdi, dep habarlaidy QazAqparat.
«Strategiialyq jáne biýdjettik josparlaý júiesine zertteý júrgizgen edik. AQSh, Ulybritaniia, Germaniia, Resei, Japoniia, Qytai jáne Singapýr elderin saralap shyqtyq. Biýdjettik jáne strategiialyq josparlaýda Singapýr óte alǵa ilgerilep ketken. Olarda da 10 jylǵa arnalǵan strategiialyq jospar bar. Bizde de 10 jylǵa strategiialyq jospar ázirlengenimen ol 5 jyldan keiin-aq jańartylyp jatady. Al olar aldyn ala árbir ministrlikke qatysty biýdjettik shekti aiqyndap qoiady. Ministrlik óziniń 5 jylǵa arnalǵan josparyn biledi jáne soǵan orai salalyq baǵdarlamalar men sheshimder qabyldaidy. Salalyq baǵdarlamalar memlekettik organdarmen emes sol salanyń sarapshylarymen kelisiledi. Bul túrtip qoia salý úshin jasalmaidy. Olar salada óte kóp niýans bolatyndyǵyn túsinedi. Barlyq máselelerdi jinap, óńdegennen keiin saitqa ornalastyrady. Bireýlerdiń birdeńeni jasyryp qalýy degen joq. Olar satyp alýdyń bir bóligin elektrondy resýrs arqyly júzege asyrady jáne kez kelgen jetkizip berýshini tańdai alady», - dedi ol.
Osy rette Oljas Qudaibergenov memlekettik organdarda áreket etý men sheshim qabyldaýda erkindik bolýy tiistigin basa aitty.
«Bizde ókinishke qarai, barlyǵy birin-birin ańdyp otyrady. Árkim óz jumysyn oryndaýy tiis. Al túptep kelgende memlekettik organdarda áreket etý men sheshim qabyldaýda erkindik bolýy kerek. Sodan keiin baryp nátijesine esep bergeni jón. Al bizde nátijege emes, formaldy protsedýralardyń saqtalýyna esep beredi. Aitalyq, tekserýshi organ ádildiktiń úlgisi bolýy tiis», - dedi sarapshy.
