videodan alynǵan kadr
Májilis depýtaty Ashat Aimaǵambetov «Qazaqstannyń ońtústik óńirlerinde ashylýy múmkin orys mektepterine reseilik pedagogterdi tartý týraly» usynysqa qatysty pikir bildirdi, dep habarlaidy Kazinform.
Áleýmettik jelide Oqý-aǵartý ministri Ǵani Beisembaevtyń eldiń ońtústiginde ashylýy múmkin mektepterge reseilik pedagogterdi shaqyrý týraly aitqan sózi tarap júr. Ádilet ministrliginde ótken vedomstvoaralyq komissiia otyrysynan keiin jýrnalister Májilis depýtaty Ashat Aimaǵambetovke osy másele týraly suraq qoidy.
«Qazaqstannyń memlekettik mektepterinde sheteldik azamattardyń sabaq berýi zańdy ma?» — dep surady BAQ ókili.
«Bul máseleni basqasha qoiý kerek. Jalpy Qazaqstanda basqa memleketterdiń azamattary jumys istei ala ma? Bul Eńbek kodeksiniń sheńberinde bar. Ózderińiz kórip júrsizder. Qazaqstanda basqa memleketterdiń azamattary túrli salalarda jumys istep jatyr. Eger sheteldikter bizdiń zańnamaǵa sáikes kelse, tiisti talaptary bar, sol talaptarǵa sáikes bolsa, onda ministrlik óziniń zańnamalyq-quqyqtyq aktilerinde qarastyrý kerek», — dedi ol.
Depýtat jekemenshik mektepterde sheteldik azamattardyń bilim berýi zańdy ekenin atap ótti.
«Mysaly, Nazarbaev mektepterinde Qurama Shtattardyń, Frantsiianyń qyzmetkerleri boldy, qazir de bar. Basqa da jekemenshik mektepterde jumys istep jatyr. Sondyqtan bul ministrlik týraly jaýap bersem, kezinde ózim basshylyq jasaǵan suraqtarǵa qystyrylǵandai bolamyn. Ministrliktiń ózine júgingenińiz durys», — dedi Ashat Aimaǵambetov.
