Bir jyldyń ishinde memlekettik qyzmettegi komandalyq aýysýdyń mólsheri 18 esege kemidi. Bul týraly búgin Astanada Muhtar Qul-Muhammed ótkizgen memlekettik qyzmetti reformalaý máseleleri boiynsha partiialyq tyńdaýlarda málim boldy, - dep habarlaidy "Ult aqparat".
«Nurotandyqtardyń» saýaldaryna Memlekettik qyzmet isteri jáne jemqorlyqqa qarsy kúres agenttiginiń tóraǵasy, sondai-aq birqatar ministrlikter men óńir ákimderiniń basshylary jaýap berdi.
2015 jyldyń aiaǵynda qabyldanǵan «Memlekettik qyzmet týraly» jańa Zańnyń tutas bir kórsetkishter boiynsha oń nátijege qol jetkizýge múmkindik týǵyzǵany atap ótildi. Atap aitqanda, bir jyldyń ishinde ǵana komandalyq aýysýdyń mólsheri 18 esege azaidy, jemqorlyqqa qarsy is-áreket boiynsha jumys kúsheitildi. Memlekettik apparattaǵy «jandy núkteler» týraly aitqan depýtattar kadrlar turaqtamaýshylyǵyna basa nazar aýdardy. 2016 jyldyń qorytyndysy boiynsha ortalyq memlekettik organdar arasynda qyzmetkerlerdiń jii aýysýynyń óte joǵary kórsetkishi Ádilet ministrliginde tirkelgen (14 paiyz). Jaǵymsyz reitingtiń joǵarǵy jaǵynda kadrlar turaqtamaýshylyǵy 11 paiyzdan asatyn Bilim jáne ǵylym ministrligi de tur.
«Nur Otan» partiiasy Tóraǵasynyń Birinshi orynbasary memlekettik organdarǵa, meritokratiia, iaǵni anaǵurlym laiyqty jáne kásibi mamandardy basshylyq qyzmetke ilgiriletý qaǵidatyna negizdelgen jumysty kúsheitýge keńes berdi, bul óz kezeginde kadrlar aýysýyn azaitady. Sonymen birge Muhtar Qul-Muhammed memlekettik qyzmetkerlerdiń óz mindetterin sapaly oryndaýyn jáne kásibi ósýin yntalandyratyn eńbek aqy tóleýdiń jańa ádiletti júiesin engizý jónindegi Prezident tapsyrmasyn oryndaý qajettiligin málimdedi.
