QR Prezident Ákimshiligi Basshysynyń birinshi orynbasary Dáýren Abaev memlekettik qyzmetshilerdiń ailyǵy ne úshin kóterilgenin túsindirdi, dep habarlaidy QazAqparat.
«Memlekettik qyzmettiń básekege qabiletsiz jumys berýshige ainalǵany sonsha, kóptegen sarapshy deńgeiindegi qujat ázirlei alatyn mamandar «Iandeks taksi» siiaqty qyzmet kórsetý salasynda kóbirek tabys taba bastady. Birinshi kezekte biz óńirlerdegi memlekettik qyzmetshilerdiń ailyǵyn kóterdik. Óitkeni, ásirese, jergilikti ákimdikterde biliktilik máselesi ózekti boldy», - degen Dáýren Abaev ailyq kóterilgennen beri qyzmetker irikteý konkýrstarynda báseke paida bolǵanyn atady.
«Buryn qalai edi? Ákimdik sarapshy laýazymyna konkýrs jariialady deiik. Bir adam ǵana ótinim beretin. Sebebi ailyǵy óte az boldy. Senińiz, mundai jaǵdaida onyń quzyrettiligin eshkim teksermeidi de. Jumys isteýge kelisse boldy deidi. Al ailyqty kóterip edi, konkýrsqa túsetin ótinimderdiń sany 7 ese ósti-aý deimin. Konkýrs qanshalyqty básekeli bolsa, irikteletin mamannyń sapasy da sonshalyqty joǵary bolady. Iaǵni, irikteýge múmkindik bar. Árine, mundai irikteýden ótip alynǵan mamannyń qateligi de áldeqaida az bolady. Sonyń arqasynda halyqtyń ómir sapasyna tigizer paidasy da kóbirek bolady», - dedi «Ashyq dialog» suhbatynyń turaqty qonaǵy.
Aitýynsha, memlekettik qyzmetshiniń ailyǵy moinyna arqalaityn jaýapkershigine sai kóterilgen.
«Taǵy bir másele jaýapkershilik deńgeiine kelip tireledi. Elestetip kórińiz, bir ministrliktegi nemese ákimdiktegi qandai da bir basqarmanyń basshysy júzdegen million teńgeniń qujatyna qol qoiady. Tekserýshi organdar sol qujattan tipti jalǵyz formaldy qate tapsa, sol úshin arqalaityn jaýapkershiliktiń qunyna buǵan deiin alyp kelgen 150 myń teńge ailyǵy tati ma? Al tutas bir salanyń nemese óńirlerdiń damýyna jaýapty ministrler men ákimderdiń jaýapkershiligi týraly aitýdyń ózi artyq», - dedi Dáýren Abaev.
