قر پرەزيدەنت ەكٸمشٸلٸگٸ باسشىسىنىڭ بٸرٸنشٸ ورىنباسارى دەۋرەن اباەۆ مەملەكەتتٸك قىزمەتشٸلەردٸڭ ايلىعى نە ٷشٸن كٶتەرٸلگەنٸن تٷسٸندٸردٸ, دەپ حابارلايدى قازاقپارات.
«مەملەكەتتٸك قىزمەتتٸڭ بەسەكەگە قابٸلەتسٸز جۇمىس بەرۋشٸگە اينالعانى سونشا, كٶپتەگەن ساراپشى دەڭگەيٸندەگٸ قۇجات ەزٸرلەي الاتىن ماماندار «ياندەكس تاكسي» سيياقتى قىزمەت كٶرسەتۋ سالاسىندا كٶبٸرەك تابىس تابا باستادى. بٸرٸنشٸ كەزەكتە بٸز ٶڭٸرلەردەگٸ مەملەكەتتٸك قىزمەتشٸلەردٸڭ ايلىعىن كٶتەردٸك. ٶيتكەنٸ, ەسٸرەسە, جەرگٸلٸكتٸ ەكٸمدٸكتەردە بٸلٸكتٸلٸك مەسەلەسٸ ٶزەكتٸ بولدى», - دەگەن دەۋرەن اباەۆ ايلىق كٶتەرٸلگەننەن بەرٸ قىزمەتكەر ٸرٸكتەۋ كونكۋرستارىندا بەسەكە پايدا بولعانىن اتادى.
«بۇرىن قالاي ەدٸ? ەكٸمدٸك ساراپشى لاۋازىمىنا كونكۋرس جارييالادى دەيٸك. بٸر ادام عانا ٶتٸنٸم بەرەتٸن. سەبەبٸ ايلىعى ٶتە از بولدى. سەنٸڭٸز, مۇنداي جاعدايدا ونىڭ قۇزىرەتتٸلٸگٸن ەشكٸم تەكسەرمەيدٸ دە. جۇمىس ٸستەۋگە كەلٸسسە بولدى دەيدٸ. ال ايلىقتى كٶتەرٸپ ەدٸ, كونكۋرسقا تٷسەتٸن ٶتٸنٸمدەردٸڭ سانى 7 ەسە ٶستٸ-اۋ دەيمٸن. كونكۋرس قانشالىقتى بەسەكەلٸ بولسا, ٸرٸكتەلەتٸن ماماننىڭ ساپاسى دا سونشالىقتى جوعارى بولادى. ياعني, ٸرٸكتەۋگە مٷمكٸندٸك بار. ەرينە, مۇنداي ٸرٸكتەۋدەن ٶتٸپ الىنعان ماماننىڭ قاتەلٸگٸ دە ەلدەقايدا از بولادى. سونىڭ ارقاسىندا حالىقتىڭ ٶمٸر ساپاسىنا تيگٸزەر پايداسى دا كٶبٸرەك بولادى», - دەدٸ «اشىق ديالوگ» سۇحباتىنىڭ تۇراقتى قوناعى.
ايتۋىنشا, مەملەكەتتٸك قىزمەتشٸنٸڭ ايلىعى موينىنا ارقالايتىن جاۋاپكەرشٸگٸنە ساي كٶتەرٸلگەن.
«تاعى بٸر مەسەلە جاۋاپكەرشٸلٸك دەڭگەيٸنە كەلٸپ تٸرەلەدٸ. ەلەستەتٸپ كٶرٸڭٸز, بٸر مينيسترلٸكتەگٸ نەمەسە ەكٸمدٸكتەگٸ قانداي دا بٸر باسقارمانىڭ باسشىسى جٷزدەگەن ميلليون تەڭگەنٸڭ قۇجاتىنا قول قويادى. تەكسەرۋشٸ ورگاندار سول قۇجاتتان تٸپتٸ جالعىز فورمالدى قاتە تاپسا, سول ٷشٸن ارقالايتىن جاۋاپكەرشٸلٸكتٸڭ قۇنىنا بۇعان دەيٸن الىپ كەلگەن 150 مىڭ تەڭگە ايلىعى تاتي ما? ال تۇتاس بٸر سالانىڭ نەمەسە ٶڭٸرلەردٸڭ دامۋىنا جاۋاپتى مينيسترلەر مەن ەكٸمدەردٸڭ جاۋاپكەرشٸلٸگٸ تۋرالى ايتۋدىڭ ٶزٸ ارتىق», - دەدٸ دەۋرەن اباەۆ.
