Memleket jáne qoǵam qairatkeri, belgili saiasattanýshy Aidos Sarym memlekettik qyzmetke keletin azamattarǵa qatysty pikir bildirdi, dep habarlaidy QazAqparat.
«Búgingi kúni memlekettik qyzmette júrý ońai sharýa emes. Onyń mashaqaty da kóp. Al eger osy salaǵa qyzmet etem dep keldiń be, onyń talabyna sai bolýyń kerek. Jáne bizdiń azamattarymyz memlekettik qyzmetke jumyssyzdyqtan nemese sharasyzdyqtan barmaýy tiis. Bul ómirlik tańdaý bolý qajet. Degenmen bul máseleniń ekinshi jaǵy da bar. Ómir boiy memleketke qyzmet etip alatynyń 80 myń teńge bolsa taǵy qiyn. Osy turǵyda memlekettik qyzmettiń abyroiy bolýy tiis. Memleket úshin otqa da túsip, sottasyp jatqan da azamattarymyz bar. Sondyqtan memlekettik qyzmetkerlerdiń bári birdei emes», - dedi A. Sarym QR Sybailas jemqorlyqqa qarsy qyzmeti agenttiginde ótken onlain konferentsiia barysynda.
Onyń aitýynsha, memlekettik qyzmette aldymen qarjy jymqyrýdyń jolyn kesý kerek.
«Búginde bizde memlekettik qyzmetker bolýdyń protsedýrasy qiyndap bara jatyr. Qazirgi ýaqytta keibir memlekettik qyzmetkerler artyq qimyl jasaýdan qorqady. Sheneýniktiń bári birdei emes, arasynda jaqsysy da, nashary da bar. Biz qazir sony ajyratyp, jaqsysynyń jaqsylyǵyn asyrýymyz qajet. Taǵy bir másele sheneýnikter men memlekettik qyzmetkerlerdiń dúnie-múlikteri men qosymsha tabys kózderin jasyrýy. Ózi memlekettik qyzmette bolǵandyqtan jeke kásipterin bala-shaǵa, aǵaiyn-týystarynyń atyna jazyp qoiady. Bul problemany da birjaqty qylýymyz qajet. Sondyqtan da memlekettik qyzmetke kelgen árbir azamattyń deklaratsiiasynda barlyq málimet ashyq túrde bolýy shart. Ásirese sheneýnikter jaǵy halyqqa shyndyqty jasyrmaǵany jón. Bul óz kezeginde onyń adaldyǵy men qazyna qarjysyn jymqyrý múmkindigin boldyrmaidy», - dedi ol.
