Memlekettik qyzmet isteri agenttiginiń tóraǵasy Anar Jaiylǵanova memlekettik apparatty qysqartýǵa qatysty jumys josparymen bólisti, dep habarlaidy QazAqparat.
«Memlekettik apparatty qysqartý jaily aitar bolsam, biz Memleket basshysynyń tapsyrmasyn oryndaýmen qatar isti oily túrde júrgizip, birde-bir adam jumyssyz qalmaityndai áreket etýimiz kerek. Bul baǵytta Memlekettik qyzmet isteri agenttiginiń amaly mynadai: biz biyl memlekettik qyzmetshilerdiń 10 paiyzyn, al 2021 jyly 15 paiyzyn qysqartamyz. Eń aldymen bul jumysty vakansiia esebinen júrgizemiz. Sonymen qatar memlekettik apparatty qysqartýmen qatar bosaǵan qyzmetkerge basqa jumysty usynamyz», - dedi Anar Jaiylǵanova Prezidenttik jastar kadrlyq rezervindegi azamattarmen elordadaǵy kezdesý barysynda.
Agenttik tóraǵasy bul rette mynadai mysal keltirdi.
«Máselen ákimdikter bosap qalǵan qyzmetkerine vedomstvoaralyq uiymdar men kvazisektordaǵy uiymdardan jumys usyna alady. Álbette kvazisektor da qysqarady. Alaida oǵan endi Ulttyq ekonomika ministrligi jaýapty. Biz qazir áreket etý algoritmin ázirleýdemiz. Onyń negizinde memlekettik qyzmetkerlerdi alyp qalý máselesi jatyr. Qysqartý jumystaryn eshbir azamat jumyssyz qalmaityndai júrgizýimiz kerek. Al eger usynylǵan qyzmet bosap qalǵan memlekettik qyzmetshiniń kóńilinen shyqpasa oǵan zańǵa sáikes tórt ailyq kóleminde ótemaqy beremiz. Ary qarai onyń ózi jumys izdeidi», - dedi ol.
Onyń málimetinshe sharalardyń taǵy biri – memlekettik apparattaǵy vakansiiaǵa moratorii jariialaý bolmaq.
«Biz moratorii jariialamaqpyz. Másele zerttelip, maquldaý satysynda tur. Belgili bir ýaqyt ishinde eshkimdi memlekettik qyzmetke qabyldaý konkýrstaryna moratoii jariialamaqpyz. 2020 jyldyń sońyna deiin, 2021 jylda da solai bolatyn sekildi. Sebebi qysqartý týraly aitýmen qatar jumysqa azamattardy alý durys emes», - dep túidi Anar Jaiylǵanova.
