Qazaqstan Respýblikasynyń Memlekettik hatshysy Qyrymbek Kósherbaev Qazaqstannyń Eńbek Eri, halyq jazýshysy Oljas Súleimenovtiń 85 jyldyq mereitoiyna orai ótken saltanatty quttyqtaý rásimine qatysty.
Memlekettik hatshy mereitoi iesine QR Tuńǵysh Prezidenti Nursultan Nazarbaevtyń jáne Memleket basshysy Qasym-Jomart Toqaevtyń quttyqtaý hattaryn tabystady, dep habarlaidy "Ult aqparat" Aqordanyń resmi saityna silteme jasap.
Memlekettik hatshy saltanatty jiynnyń ashylýynda Táýelsizdigimizdiń 30 jyldyǵy aiasynda ataqty jazýshynyń mereitoiy erekshe mánge ie bolǵandyǵyn jetkizdi, Oljas Súleimenovtiń ádebietshi, parlamentarii, diplomat jáne qoǵam qairatkeri retinde elimizdiń órkendeýine qosqan zor úlesi men halyqaralyq abyroi-bedelin atap ótti.
Qyrymbek Kósherbaev atap ótkendei, Oljas Súleimenov – mádeniettiń asyl jaýharlaryn saqtap qalyp, zamanaýi jahandaný syn-qaterlerine tótep bere alatyn, sondai-aq adamzattyń órkendeýine múmkindik beretin ǵalamsharlyq sananyń aqyny. Bul, ásirese, qazirgi ýaqytta rýhani jańarý men halyq sanasyn jańǵyrtý jolyndaǵy bizdiń halqymyz úshin asa ózekti.
Saltanatty jiynda Mádeniet jáne sport ministri Aqtoty Raiymqulova, Almaty qalasynyń ákimi Baqytjan Saǵyntaev, TÚRKSOI-dyń bas direktory Dúisen Qaseiinov, Qazaqstan Jazýshylar odaǵynyń tóraǵasy Ulyqbek Esdáýlet sóz sóiledi.
Sonymen qatar Qazaqstannyń Eńbek Eri, halyq ártisi Asanáli Áshimov, akademik Tóregeldi Sharmanov, Halyqaralyq Túrki akademiiasynyń Prezidenti Darhan Qydyráli ózderiniń jyly lebizderi men tilekterin bildirdi.
Memlekettik hatshy birqatar ziialy qaýym ókilderimen jáne sarapshylarmen birqatar kezdesý ótkizdi.
