QR Qarjy ministri Erulan Jamaýbaev Úkimette memleket biýdjet kiristeri men asyra oryndalǵan josparlar týraly aityp berdi, dep habarlaidy QazAqparat.
«Biylǵy 10 aida memlekettik biýdjetke 8 trln 719 mlrd teńge kiris tústi nemese jospar 102,9%-ke atqaryldy. Respýblikalyq biýdjetke 5,6 trln teńge tústi nemese jospar 100,2%-ke atqaryldy. Jalpy, kirister boiynsha jospar 13 mlrd teńgege, onyń ishinde salyqtar - 24 mlrd teńgege asyra oryndaldy. Bul rette salyqtyq emes túsimder 14 mlrd teńgege atqarylmady», - dedi Qarjy ministri Úkimet otyrysynda.
Onyń aitýynsha, salyq boiynsha asyra oryndaýdyń negizgi somalary korporativtik tabys salyǵyna, paidaly qazbalardy óndirýge salynatyn salyqqa jáne shiki munaiǵa eksporttyq kedendik bajǵa tiesili.
«Korporativtik tabys salyǵy boiynsha jospardyń asyra oryndalýy 666 iri salyq tóleýshi boiynsha avanstyq tólemderdiń 66,5%-ke ulǵaiýyna bailanysty. Paidaly qazbalardy óndirýge salyq boiynsha jospardy asyra oryndaýǵa 2020 jylmen salystyrǵanda biylǵy 10 aida negizgi eksporttyq pozitsiialarǵa baǵanyń orta eseppen 28%-ke ósýi áser etti. Shiki munaiǵa eksporttyq kedendik baj boiynsha jospardyń asyra oryndalýyna biylǵy 10 aidaǵy munai baǵasynyń orta eseppen 44,6%-ke ósýi áser etti», - dep túsindirdi E. Jamaýbaev.
Sonymen birge, jergilikti biýdjetterdiń kiristeri 108,1%-ke atqaryldy jáne 3,1 trln teńgeni qurady. Jospar 231 mlrd teńgege, onyń ishinde salyq boiynsha – 177 mlrd teńgege asyra oryndalǵan.
