Memlekettik qyzmet isteri agenttiginde ótken brifingte Agenttik tóraǵasy Anar Jaiylǵanova Memleket basshysy bekitken memlekettik basqarý tujyrymdamasynyń negizgi tarmaqtary týraly aitty, dep habarlaidy QazAqparat.
«Biyl 26 aqpanda Memleket basshysy memlekettik basqarýdyń adamdarǵa baǵyttalǵan modelin damytý tujyrymdamasyn maquldady. Memlekettik basqarý halyqtyń úmitin aqtaýy kerek. Sonymen birge, azamattyq belsendiliktiń edáýir artýy qazaqstandyq qoǵamnyń jetilgendigin jáne memlekettik basqarý protsesine qatysý qajettiligin kórsetedi. Tujyrymdama azamattardyń memleketpen ózara qarym-qatynasyn jaqsartýǵa, memlekettik josparlaýdyń tiimdiligin, memlekettik qyzmet kadrlarynyń sapasyn arttyrýǵa, memlekettik qyzmet kórsetýdiń belsendi formatyna aýysýǵa, normativtik-quqyqtyq jáne sybailas jemqorlyqqa qarsy saiasatty jetildirýge, sonymen qatar sot jáne quqyq qorǵaý júiesin ózgertýge baǵyttalǵan», - deidi QR Memlekettik qyzmet isteri agenttiginiń tóraǵasy.
Onyń aitýynsha, memlekettik basqarýdyń jańa modeli «halyq únine qulaq asatyn», kásibi jáne pragmatikalyq memleket qaǵidatyna negizdelgen bolady.
«Tujyrymdamaǵa sai keletin memlekettik basqarýǵa qol jetkizý úshin «tulǵaǵa baǵdarlanǵan» model qurýdan bastap, ońtaily, klientke baǵdarlanǵan jáne ashyq memlekettik apparat qalyptastyrý josparlanýda. Sondai-aq, azamattardyń qajettiligine negizdelgen memlekettik qyzmetterdi belsendi kórsetýge kóshý, kadrlar sapasyn arttyrý jáne memlekettik apparattyń kásibilenýi qarastyrylady. Kadrlar sapasyn jaqsartý jáne memlekettik apparattyń kásibilendirilýi, sot jáne quqyq qorǵaý júiesin qaita qurý josparlanýda», - deidi Anar Jaiylǵanova.
