Qazaqstan Qurylysshylar odaǵynyń basshysy Talǵat Erǵaliev memlekettik baǵdarlamalar boiynsha beriletin turǵyn úi sapasyna syn nege kóp aitylatynyn túsindirdi, dep habarlaidy QazAqparat.
«Kommertsiialyq turǵyn úi men memlekettik baǵdarlamalar boiynsha boi kótergen turǵyn úi sapasy ár túrli. Memlekettik baǵdarlamalar boiynsha salynǵan baspananyń sapasy nege nashar? Biyl memlekettik baǵdarlamalar boiynsha turǵyn úi qurylysyn júzege asyrýǵa konkýrs ótkizildi. Onyń qarajaty 2020 jyly biýdjetke engizilip qoiylǵan. Al smeta tipti 2019 jyly jasalǵan. Úsh jyl ishinde materialdardyń quny da, jumystyń quny da qymbattady», - dedi Talǵat Erǵaliev qurylysshylar odaǵy otyrysynyń aldynda BAQ ókilderine bergen suhbatynda.
Onyń sózinshe, materialdardyń quny jyl saiyn 10%-15% ósip otyrady.
«Qurylys kompaniiasy memlekettik baǵdarlamalardy júzege asyrýǵa kirisken kezde biýdjetke engizilgen baǵalar baiaǵyda ózgerip ketedi. Sony bilse de, baiqaýǵa qatysýshylar ǵajaiypqa úmittenip, táýekelmen qujat ókizýge májbúr», - dep túsindirdi Talǵat Erǵaliev.
Josparly qurylystyń saldarynan osylaisha jumystyń sapasy aqsaityn kórinedi.
«Biraq qurylysshy kútken úmit bolmaityny aitpasa da túsinikti. Sondyqtan ol úsh jyl burynǵy esep boiynsha bólingen aqshaǵa biliktiligi tómen adamdardy jaldap, arzan materialdardy salyp amaldaidy. Jańa ǵana berilgen úilerdiń plitalary qirap, sylaqtary túsip jatatyny sondyqtan», - dep túiindedi Qazaqstan qurylysshylary odaǵynyń basshysy.
