Almaty qalasynyń Ishki memlekettik aýdit departamenti ómirlik qiyn jaǵdaidaǵy balalardy qoldaý ortalyǵynyń jumysynan 10,1 mln teńgeniń zańsyzdyǵyn anyqtaǵan, dep habarlaidy "Ult aqparat".
2018 jylǵy 01 qańtary men 2020 jylǵy 31 jeltoqsan aralyǵyn qamtyǵan memlekettik aýdit kezinde anyqtalǵan zańsyzdyqtardyń jalpy somasy - 10 mln 131 myń teńge.
«Sonymen qatar, ortalyqtyń jumysynda kadrlyq qamtamasyz etý limitteriniń bolmaýy, qyzdar men uldarǵa arnalǵan aksessýarlar men gigienalyq taýarlardyń mólsheri naqtylanbaýy, keńse kerek-jaraqtary jáne kámeletke tolmaǵan bir adamǵa mindetti orta bilim alý úshin qajetti basqa da quraldardy qarjylyq qamtamasyz etý normalarynyń bolmaýy, kámeletke tolmaǵandardyń ortalyqta qysqa merzimdi bolatynyn eskere otyryp, kúnine 1 balaǵa dári-dármekterdi bosatý boiynsha zańnamanyń jetildirilmeýimen bailanysty. Sondai-aq, ártúrli sozylmaly, psihologiialyq jáne basqa da aýrýlaryna bailanysty qiyn ómirlik jaǵdaiǵa tap bolǵan árbir kámeletke tolmaǵan adamǵa jeke kútim qajet bolsa da, báriniń bir ortalyqta bolýy da ortalyq jumysyndaǵy aqaýlarǵa jol ashqan bolýy múmkin», - dep jazylǵan Qarjy ministrliginiń ishki memlekettik aýdit komitetiniń habarlamasynda.
Komitet mamandary ortalyqqa túsken balalardyń kiim-keshek normalaryn retteýi tiis normativtik-quqyqtyq aktiler arasynda qaishylyqtar bar ekenin anyqtaǵan. Alynatyn zattardy nysanǵa keletin balalardyń sanaty men kútim merzimin eskere otyryp josparlaý tetigi de jolǵa qoiylmaǵan.
«Zańnamanyń jetildirilmeýi kámeletke tolmaǵandar arasyndaǵy quqyqtyq zańsyzdyqtardyń, qadaǵalaýsyz jáne panasyz qalýdyń aldyn alý memlekettik saiasat qaǵidattarynyń buzylýyna ákep soqtyrǵan. Atap aitqanda, ómirlik qiyn jaǵdaidaǵy árbir kámeletke tolmaǵan adamǵa kórsetiletin jeke kútimniń ǵylymi negizdi bolý qaǵidaty buzylǵan. Osylaisha, 2004 jylǵy 9 shildedegi N 591 «Kámeletke tolmaǵandar arasyndaǵy quqyq buzýshylyqtardyń aldyn alý jáne balalardyń qadaǵalaýsyz jáne panasyz qalýynyń aldyn alý týraly» Qazaqstan Respýblikasy Zańynyń 3-baby buzylǵan», - deidi Almaty qalasy boiynsha ishki memlekettik aýdit departamentiniń basshysy Rahymjan Dildaev.
