Foto: instagram.com/tina_kandelaki
Qazaqstanǵa til tigizgen reseilik jýrnalist Tina Kandelaki elge kire almaidy. Bul týraly Syrtqy ister ministrliginiń resmi ókili Aibek Smadiiarov aitty, - dep habarlaidy "Ult aqparat".
"Qoǵam ózi jaýap berdi, kórdińizder ǵoi, qyzý talqylandy. Oǵan ne qosaiyn?
Eń ókinishtisi, ondaidy aityp júrgen árbir sheteldik azamatqa jaýap bere bersek, ózimizdi umytyp qalamyz. Ózimizdiń qansha ishki máselemiz bar, soǵan kóńil bóleiik. Syrttan anaý aitty, mynaý aitty dep kóńil bóle bersek, ýaqytymyz jetpeidi. Ekinshi ókinishti másele - kórshi eldegi azamattar, óz dostarymyzdyń bizdiń el týraly beihabar ekeni adamdy kishkene ókpeletedi. Óitkeni olardyń biz týraly aqparaty durys emes. Bizdiń elge kelip qalai ómir súrip jatqanymyzdy kórsin. Oidan shyǵaryp jaza bergenshe, áleýmettik jelide qyrylysqansha, odan da ózimizdiń jumysymyzdy odan ári qarai jalǵastyraiyq" - dedi ol.
Ministrlik ókiliniń aitýynsha, Qazaqstanǵa qara kúie jaqqandardyń arnaiy tizimi joq.
"Tizim dep sizder qaita-qaita surai beresizder. Naqty bir, eki, úsh degen tizim joq. Ol — jalpy ár memlekettiń óziniń ishki sharasy. Sizge bireý unamasa, úiińizge kirgizbeisiz ǵoi. Týra sol siiaqty biz de kirgizbeimiz. Kerek kezde shara qabyldanady. Ony naqty „búgin kirgizdińizder me, erteń kirgizesizder me“ dep talap etpeńizder. Memleket ondaidy eshqashan keshirmeidi. Ol Qazaqstanǵa kele qoimas, kelgen jaǵdaida kirmeidi", — dedi Aibek Smadiiarov.
Eske salaiyq, buǵan deiin reseilik telejýrnalist Tina Kandelaki Qazaqstanda orys tiliniń aiasy taralyp jatqanyn aityp, dabyl qaqqan edi.
Kólik ministrligi keibir temir jol stantsiialaryn (Nur-Sultan – Astanaǵa, Nur-Sultan – Nurly joldy – Nurly jol, Kosshokýdy – Qosshoqyǵa, Sai-Ýtesti – Saióteske, Ózendi – Jańaózenge, Ýraldy – Oralǵa, Qumshaǵyldy – Qumshaǵalǵa) qaita ataý týraly Úkimet qaýlysynyń jobasyn jariialaǵan bolatyn.
Al Kandelaki Telegram-daǵy jeke paraqshasynda Qazaqstan osylaisha orys tilin memlekettik deńgeide yǵystyryp jatyr dep pikir jazǵan.
Reseilik telejúrgizýshiniń bul pikiri áleýmettik jelide qyzý talqylandy.
video: M NEWS / Youtube
